بنگلور ، انڈین پریمیئر لیگ (آئی پی ایل) میں رائل چیلنجرز بنگلور (آر سی بی) کی پہلی بار فتح کا جشن جان لیوا ثابت ہوا ، بنگلور میں جشن کے دوران بھگدڑ مچنے سے 11 افراد جاں بحق اور متعدد زخمی ہو گئے۔
یہ افسوسناک واقعہ2 روز قبل اس وقت پیش آیا جب آر سی بی کی تاریخی جیت کے بعد بنگلور کے دو مختلف مقامات پر ہزاروں افراد جشن منانے کے لیے جمع ہوئے، ہجوم کے بے قابو ہونے پر بھگدڑ مچ گئی، جس کے نتیجے میں کم از کم 11 افراد اپنی جان سے ہاتھ دھو بیٹھے۔
واقعے کی سنگینی کے پیش نظر بنگلور پولیس نے فوری کارروائی کرتے ہوئے رائل چیلنجرز بنگلور کے متعدد ملازمین کو گرفتار کر لیا ہے، گرفتار افراد میں فرنچائز کے ہیڈ آف مارکیٹنگ اینڈ ریونیو سمیت ایک نجی انٹرٹینمنٹ نیٹ ورک کے دو اعلیٰ عہدیدار بھی شامل ہیں۔
ذرائع کے مطابق، ان گرفتاریوں کے احکامات کرناٹک کے وزیر اعلیٰ نے جاری کیے، جنہوں نے واقعے پر شدید اظہار افسوس کرتے ہوئے پولیس کے کئی اہلکاروں کو بھی معطل کر دیا ہے، حکومت کیجانب سے واقعے کی اعلیٰ سطحی تحقیقات کا آغاز کر دیا گیا ہے، تاکہ ذمہ داران کا تعین کیا جا سکے اور آئندہ ایسے سانحات سے بچاؤ ممکن بنایا جا سکے۔
