لاہور، صوبائی وزیر اطلاعات اور رہنما مسلم لیگ ن عظمیٰ بخاری کا کہنا ہے کہ پی ٹی آئی جلسے کی آڑ میں ملک میں فساد برپا کرنا چاہتی ہے۔
اپنے ایک بیان میں صوبائی وزیر اطلاعات عظمیٰ بخاری نے کہا کہ عدالت نے پی ٹی آئی کو لاہور میں جلسہ کرنے کی اجازت ہرگز نہیں دی، عدالت کی جانب سے ڈپٹی کمشنر کو جلسے کی اجازت دینے یا نہ دینے کا فیصلہ کرنے کی ہدایت کی گئی ہے، ڈپٹی کمشنر اور دیگر قانون نافذ کرنے والے ادارے اس متعلق میٹنگ کر رہے ہیں۔
عظمی بخاری کی جانب سے یہ دعویٰ کیا گیا کہ مخصوص جماعت کے لوگوں کی کچھ آڈیو کالز سامنے آئی ہیں، ان آڈیو کالز میں پی ٹی آئی کے لوگ فساد برپا کرنے کی پلاننگ کر رہے ہیں۔
تحریک فساد کا ماضی کا ٹریک ریکارڈ بھی سب کے سامنے ہے، یہ لوگ جلسے کے نام پر دہشت گردی اور فساد برپا کرنا چاہتے ہیں۔
صوبائی وزیر کا کہنا تھا کہ کسی کو سیاسی لبادہ اوڑھ کر فساد پھیلانے کی ہرگز اجازت نہیں دی جائے گی، حکومت نے کسی بھی سیاسی و مذہبی جماعت کو جلسے جلوس کرنے سے روکا ہے نہ روکے گی۔
عظمی بخاری کا کہنا ہے کہ سربراہ جے یو آئی (ف) مولانا فضل الرحمن نے بھی پچھلے دنوں لاہور میں جلسہ کیا ہے، تحریک انصاف کے اسلام آباد جلسے میں کیا ہوا وہ بھی سب کے سامنے ہے۔
