پاکستان تحریک انصاف (پی ٹی آئی) خیبرپختونخوا کے صدر جنید اکبر نے اسلام آباد کی جانب اعلان کردہ لانگ مارچ کے حوالے سے کہا ہے کہ گزشتہ احتجاج میں کارکنوں کی لاشیں اٹھا کر واپس جانا پڑا تھا، تاہم اس مرتبہ ایسا نہیں ہوگا۔
مردان میں ورکرز کنونشن سے خطاب کرتے ہوئے جنید اکبر نے کہا کہ پی ٹی آئی اسلام آباد جائے گی اور دارالحکومت کی جانب صرف ایک راستہ اختیار نہیں کیا جائے گا۔
مختلف راستوں سے اسلام آباد پہنچنے کا اعلان
جنید اکبر کا کہنا تھا کہ کارکن موٹروے اور جی ٹی روڈ کے علاوہ مارگلہ کے پہاڑوں اور ڈی آئی خان کی سمت سے بھی اسلام آباد کی جانب جائیں گے۔
انہوں نے گزشتہ احتجاج کا حوالہ دیتے ہوئے کہا کہ اس وقت حالات ایسے تھے کہ کارکن احتجاج جاری رکھنے کی پوزیشن میں نہیں تھے اور انہیں لاشیں اٹھا کر واپس جانا پڑا۔ ان کے مطابق اس مرتبہ صورتحال مختلف ہوگی اور کارکن اپنے مطالبات کے لیے احتجاج کریں گے۔
جنید اکبر نے اپنے خطاب میں کہا کہ ’’اسلام آباد کو سومنات بنائیں گے‘‘۔
پی ٹی آئی رہنما کا یہ بیان ایسے وقت میں سامنے آیا ہے جب پارٹی نے 27 ستمبر کو اسلام آباد کی جانب لانگ مارچ کا اعلان کر رکھا ہے۔ پی ٹی آئی چیئرمین بیرسٹر گوہر علی خان نے بھی 20 ستمبر کو کہا کہ مذاکرات کی کوششیں جاری رہنی چاہئیں، تاہم حکومت کے ساتھ بات چیت میں فی الحال کوئی پیش رفت نہیں ہوئی۔ انہوں نے یہ بھی کہا کہ پارٹی کی جانب سے سڑکیں بند کرنے کا ارادہ نہیں ہے۔
جماعت اسلامی کا پیٹرولیم لیوی کے خلاف کراچی سے اسلام آباد لانگ مارچ شروع
حکومتی ردعمل
جنید اکبر کے بیان پر وزیر مملکت برائے داخلہ طلال چوہدری نے ردعمل دیتے ہوئے کہا کہ اگر مظاہرین پُرامن شہریوں کی حیثیت سے اسلام آباد آنا چاہتے ہیں تو آئیں، تاہم ان کے بقول قانون کی خلاف ورزی یا تشدد کی اجازت نہیں دی جائے گی۔
طلال چوہدری نے کہا کہ اسلام آباد ہائی کورٹ کے احکامات پر مکمل عمل درآمد کیا جائے گا اور ایسا کوئی اقدام برداشت نہیں کیا جائے گا جس سے شہریوں کی جان و مال کو خطرہ ہو یا شہر میں معمولات زندگی متاثر ہوں۔
وزیر مملکت نے جنید اکبر کے ’’سومنات‘‘ والے بیان پر بھی ردعمل دیتے ہوئے کہا کہ حکومت اس طرز کی سوچ کو آگے بڑھنے نہیں دے گی۔ انہوں نے دعویٰ کیا کہ اس بیان سے پی ٹی آئی کے احتجاج کے حوالے سے اس کے ارادوں کا اندازہ ہوتا ہے۔
اسلام آباد ہائی کورٹ کے احکامات کیا ہیں؟
پی ٹی آئی کے 27 ستمبر کے لانگ مارچ سے متعلق درخواست پر اسلام آباد ہائی کورٹ نے اپنے تفصیلی فیصلے میں قرار دیا ہے کہ کسی سیاسی جماعت کو احتجاج کے نام پر عوامی سڑکوں، شاہراہوں، انٹرچینجز، ٹول پلازوں یا سرکاری عمارتوں پر قبضہ کرنے کا قانونی حق حاصل نہیں۔ عدالت نے یہ بھی کہا کہ شہریوں کے بنیادی حقوق کی خلاف ورزی آئینی خلاف ورزی تصور ہوگی۔
حکومت کی جانب سے بھی پی ٹی آئی کے احتجاج کے حوالے سے واضح کیا گیا ہے کہ قانون اور عدالتی احکامات پر عمل درآمد یقینی بنایا جائے گا۔ دوسری جانب پی ٹی آئی کا مؤقف ہے کہ اس کا 27 ستمبر کا احتجاج پُرامن اور آئینی ہوگا۔
لانگ مارچ سے قبل حکومت اور پی ٹی آئی کے درمیان سیاسی رابطوں کی کوششیں بھی جاری ہیں، تاہم فریقین کے درمیان اختلافات تاحال برقرار ہیں۔
