ٹرائی نیشن سیریز فائنل، پاکستان اور سری لنکا آج مدمقابل ہوں گے

ٹی ٹوئنٹی ٹرائی نیشن سیریز کا فائنل آج پاکستان اور سری لنکا کے درمیان راولپنڈی اسٹیڈیم میں کھیلا جائے گا۔ فیصلہ کن معرکہ شام 6 بجے شروع ہوگا۔

سیریز میں پاکستان نے شاندار کارکردگی کا مظاہرہ کرتے ہوئے 4 میں سے 3 میچز جیت کر فائنل میں جگہ بنائی، جبکہ سری لنکا نے 2 میچز میں کامیابی حاصل کرکے فائنل کے لیے کوالیفائی کیا۔ سری لنکن ٹیم نے اپنے ابتدائی میچ میں زمبابوے کو ہرایا اور گروپ مرحلے کے آخری میچ میں پاکستان کو شکست دی تھی۔

فائنل سے قبل پاکستانی کپتان سلمان علی آغا اور سری لنکن کپتان داسن شناکا نے مقامی ہوٹل میں ٹرافی کے ساتھ تصویریں بنوائیں، جہاں دونوں ٹیموں نے فائنل میں کامیابی کے عزم کا اظہار کیا۔

کرکٹ شائقین اس اہم مقابلے کا بے چینی سے انتظار کر رہے ہیں، جبکہ دونوں ٹیمیں ٹائٹل جیتنے کے لیے پُرعزم ہیں۔