بانی پاکستان تحریک انصاف (پی ٹی آئی) عمران خان کو طبی معائنے اور آنکھوں کے فالو اَپ علاج کے لیے اڈیالہ جیل سے رات گئے پاکستان انسٹی ٹیوٹ آف میڈیکل سائنسز (پمز) اسلام آباد منتقل کیا گیا، جہاں ڈاکٹروں نے ان کا معائنہ کیا۔ اسپتال انتظامیہ کے مطابق ان کی عمومی جسمانی حالت تسلی بخش اور مستحکم ہے۔

پمز اسپتال کی جانب سے جاری اعلامیے میں بتایا گیا کہ عمران خان کے طبی معائنے کے دوران ان کے طبی اشاریے معمول کے مطابق پائے گئے۔

آنکھوں کا فالو اَپ علاج اور انجکشن

اسپتال انتظامیہ کے مطابق ماہر امراض چشم کی ہدایت پر بانی پی ٹی آئی کی آنکھ میں اینٹی وی ای جی ایف (Anti-VEGF) انجکشن لگایا گیا۔

اعلامیے میں کہا گیا کہ انجکشن لگانے کا عمل شعبہ امراض چشم کی ٹیم نے مکمل کیا، جبکہ طبی معائنے کے بعد ان کی مجموعی صحت کی حالت تسلی بخش قرار دی گئی۔

عمران خان کی میڈیکل فٹنس رپورٹ تیار، مندرجات خفیہ رکھے جائیں گے، پمز

طبی معائنے کے بعد اڈیالہ جیل منتقلی

جیل ذرائع کے مطابق پمز اسپتال میں طبی معائنے اور آنکھوں کے فالو اَپ علاج کی تکمیل کے بعد عمران خان کو واپس اڈیالہ جیل منتقل کر دیا گیا۔

اسپتال انتظامیہ نے اپنے اعلامیے میں ان کی جسمانی حالت کو مستحکم قرار دیا ہے۔

ماخذ: پمز اسپتال کا اعلامیہ، جیو نیوز