پنجاب کے ضلع کوٹ ادو میں پسند کی شادی کی اجازت نہ ملنے پر ایک نوجوان نے مبینہ طور پر خود پر ڈیزل چھڑک کر آگ لگا لی، جس کے نتیجے میں وہ بری طرح جھلس گیا۔ ریسکیو حکام نے متاثرہ نوجوان کو تشویشناک حالت میں نشتر اسپتال ملتان منتقل کر دیا ہے۔
ریسکیو حکام کے مطابق یہ واقعہ کوٹ ادو کے علاقے تونسہ موڑ میں پیش آیا، جہاں نوجوان نے خود پر ڈیزل ڈال کر آگ لگا لی۔ واقعے کی اطلاع ملنے پر امدادی اہلکار موقع پر پہنچے اور زخمی نوجوان کو ابتدائی طبی امداد کے بعد اسپتال منتقل کیا۔
نوجوان کا 60 فیصد سے زائد جسم جھلس گیا
ریسکیو حکام نے بتایا کہ آگ لگنے کے باعث نوجوان کے جسم کا 60 فیصد سے زیادہ حصہ جھلس گیا ہے۔ اس کی حالت تشویشناک ہونے کے باعث اسے نشتر اسپتال ملتان کے برن یونٹ منتقل کیا گیا، جہاں اسے طبی امداد فراہم کی جا رہی ہے۔
فیصل آباد میں 10 سالہ بچی پر پیٹرول چھڑک کر آگ لگانے کا مبینہ واقعہ، چچی ملزمہ نامزد
پسند کی شادی کی اجازت نہ ملنے پر دلبرداشتہ تھا، اہلخانہ
متاثرہ نوجوان کے اہلخانہ کے مطابق اسے پسند کی شادی کی اجازت نہیں مل رہی تھی، جس پر وہ دلبرداشتہ ہو گیا اور اس نے یہ انتہائی قدم اٹھایا۔
دوسری جانب پولیس نے واقعے کی تحقیقات شروع کر دی ہیں تاکہ اس کے حالات اور محرکات کا تعین کیا جا سکے۔ فی الحال واقعے سے متعلق مزید تفصیلات سامنے نہیں آئی ہیں۔
ماخذ: جیو نیوز
