گجرات میں اربن فلڈنگ کی تباہ کن صورتحال چوتھے روز بھی جاری ہے، مسلسل بارشوں اور پانی کی آمد کے باعث شہر کے بیشتر علاقے زیرِ آب آ چکے ہیں۔ ہر طرف پانی ہی پانی نظر آ رہا ہے، جس نے شہریوں کی روزمرہ زندگی کو بری طرح متاثر کر دیا ہے۔
شہر کی مرکزی شاہراہیں، گلیاں، بازار اور رہائشی علاقے سبھی پانی میں ڈوبے ہوئے ہیں۔ نکاسی آب کا ناقص نظام صورتحال کو مزید ابتر بنا رہا ہے، جس کے باعث ٹریفک کی روانی شدید متاثر ہوئی ہے جبکہ شہری گھروں میں محصور ہو کر رہ گئے ہیں۔
ریسکیو ادارے محدود وسائل کے ساتھ امدادی کاموں میں مصروف ہیں، تاہم پانی کی مسلسل آمد نے ان کی کوششوں کو بھی مشکل بنا دیا ہے۔ متاثرہ علاقوں میں شہری پینے کے صاف پانی، خوراک اور دیگر بنیادی سہولیات کے فقدان کا سامنا کر رہے ہیں۔
محکمہ موسمیات کے مطابق آئندہ چند روز تک بارشوں کا سلسلہ جاری رہنے کا امکان ہے، جس کے پیش نظر شہریوں کو احتیاطی تدابیر اختیار کرنے کی ہدایت کی گئی ہے۔ ضلعی انتظامیہ کا کہنا ہے کہ ریلیف اقدامات جاری ہیں اور متاثرہ علاقوں میں جلد پانی کی نکاسی کو ممکن بنایا جائے گا۔
گجرات میں سیلاب نے تباہی مچادی،وزیر اعلیٰ مریم نواز آج دورہ کریں گی
شہری حلقوں نے مطالبہ کیا ہے کہ حکومت فوری اقدامات کرے تاکہ عوام کو اس اذیت ناک صورتحال سے نکالا جا سکے۔
