اسلام آباد، پاکستان تحریک انصاف سے نکالے گئے رہنما شیر افضل مروت نے کہا کہ بانی پی ٹی آئی و سابق وزیراعظم عمران خان سے ملاقات کے لیے جانے والوں میں صرف ایک وکیل ہوتا ہے اور باقی 9 کان بھرنے والے ہوتے ہیں۔
اسلام آباد میں میڈیا سے گفتگو کے دوران شیر افضل مروت نے کہا کہ جو وکلا اڈیالہ جیل جاتے ہیں ان میں 10 میں سے صرف ایک بانی پی ٹی آئی کا وکیل ہوتا ہے جبکہ باقی 9 کان بھرنے کے لیے جاتے ہیں۔
شیر افضل مروت نے کہا کہ کسی عدالت میں آپ کو یہ وکیل کے طور پر نظر نہیں آئیں گے، چیلنج کرتا ہوں جو نامور وکلا میڈیا پر نظر آتے ہیں ان میں سوائے ایک آد کے عمران خان کا وکیل بھلا کون ہے، وکلا نے بنیادی طور پر پیغام رسانی کا کام شروع کر رکھا ہے۔
شیر افضل مروت کا کہنا ہے کہ وکلا جا کر بانی پی ٹی آئی کو شکایات لگاتے ہیں، ایک وکیل کہتا ہے کہ آپ کے خلاف بیان دے دیا گیا، دوسرا وکیل پہلے وکیل کی تائید کر دیتا ہے، تیسرا وکیل دعویٰ کر دیتا ہے کہ میں نے بھی ذرائع سے کنفرم کیا ہے بات درست ہے۔
کیا عمران خان اتنی جلدی بات پر یقین کر لیتے ہیں؟ صحافی کے سوال پر شیر افضل مروت نے کہا کہ یہ لوگ بانی پی ٹی آئی عمران خان کے مزاج کو اچھی طرح سمجھتے ہیں اور ان سے اپنا کام نکلوا لیتے ہیں۔
واضح رہے کہ 2 روز پہلے پی ٹی آئی نے عمران خان کی ہدایت پر شیر افضل مروت کو پارٹی پالیسی کی خلاف ورزی پر پی ٹی آئی سے نکال دیا تھا جس کے جواب میں شیر افضل مروت نے سوشل میڈیا پر طویل تحریر لکھی تھی جس میں ان کا کہنا تھا پارٹی اگر خود سے مجھ سے متعلق فیصلے پر نظر کرے تو ٹھیک ورنہ میں اپنے لیے کوئی رعایت نہیں مانگوں اور پارٹی کے فیصلے کا احترام کرتے ہوئے اسے قبول کروں گا۔
شیر افضل مروت نے کہا کہ میں ہمیشہ عمران خان اور پی ٹی آئی کیساتھ وفادار رہا ہوں لیکن اپنے اصولوں پر کبھی سمجھوتہ نہیں کروں گا، پارٹی سے وفاداری کا ہرگز یہ مطلب نہیں کہ ہر فیصلے کو آنکھیں بند کر کے قبول کر لیا جائے بلکہ ہمیں کوشش کرتے رہنا چاہیے کہ پارٹی صحیح راستے پر گامزن رہے۔
