خرم شہزاد حیدر وڑائچ نے پولیس افسران کو شہریوں کی شکایات کے فوری ازالے اور جرائم پیشہ عناصر کے خلاف بلاامتیاز کارروائی کی ہدایت کردی۔
ریجنل پولیس آفیسر (آر پی او) گوجرانوالہ خرم شہزاد حیدر وڑائچ نے ضلع گوجرانوالہ کا تفصیلی دورہ کیا، جہاں انہوں نے کامونکی اور نوشہرہ ورکاں میں مختلف پولیس تھانوں، مال خانہ اور ایس ڈی پی او دفاتر کا معائنہ کیا۔ اس موقع پر انہوں نے پولیس افسران سے پیشہ ورانہ امور، امن و امان اور جرائم کی صورتحال پر بریفنگ لی جبکہ پولیس کارکردگی کا بھی جائزہ لیا۔
تھانوں کے ریکارڈ اور انتظامی امور کا معائنہ
آر پی او خرم شہزاد حیدر وڑائچ نے تھانہ صدر کامونکی کا SIPS معائنہ کیا۔ اس دوران انہوں نے تھانے کے ریکارڈ، صفائی ستھرائی، فرنٹ ڈیسک، حوالات اور دیگر انتظامی امور کا جائزہ لیا اور متعلقہ افسران کو ضروری ہدایات جاری کیں۔
انہوں نے مال خانہ کامونکی کا بھی معائنہ کیا اور مقدمات سے متعلق مالِ مقدمہ کی حفاظت، ریکارڈ کی تکمیل اور دیگر معاملات کو قواعد و ضوابط کے مطابق یقینی بنانے کی ہدایت کی۔
بعد ازاں آر پی او نے تھانہ سٹی کامونکی کا بھی SIPS معائنہ کیا، جہاں انتظامی اور تفتیشی امور کا جائزہ لیا گیا۔ انہوں نے افسران کو ہدایت کی کہ شہریوں کی شکایات پر فوری کارروائی، مقدمات کی میرٹ پر تفتیش اور جرائم پیشہ عناصر کے خلاف بلاامتیاز قانونی کارروائی یقینی بنائی جائے۔
کامونکی میں کھلی کچہری، شہریوں کے مسائل سنے
ریجنل پولیس آفیسر نے مدینہ مارکی کامونکی میں کھلی کچہری کا انعقاد بھی کیا، جہاں شہریوں نے اپنے مسائل اور شکایات براہِ راست آر پی او کے سامنے پیش کیں۔
خرم شہزاد حیدر وڑائچ نے متعلقہ پولیس افسران کو شہریوں کی شکایات کے فوری ازالے اور میرٹ پر قانونی کارروائی کے احکامات جاری کیے۔ انہوں نے واضح کیا کہ عوامی مسائل کے حل میں کسی قسم کی غفلت یا تاخیر برداشت نہیں کی جائے گی۔
آر پی او گوجرانوالہ کا تھانہ منگوال اور کنجاہ کا دورہ، سہولیات اور سکیورٹی انتظامات کا جائزہ
جرائم کی روک تھام کے لیے مؤثر حکمت عملی کی ہدایت
آر پی او نے ایس ڈی پی او آفس کامونکی کا بھی معائنہ کیا، جہاں انہیں سرکل میں امن و امان، جرائم کی صورتحال، تفتیشی امور اور پولیس کارکردگی کے حوالے سے بریفنگ دی گئی۔
انہوں نے افسران کو ہدایت کی کہ جرائم کی روک تھام کے لیے مؤثر حکمت عملی اپنائی جائے، پٹرولنگ کے نظام کو مزید بہتر بنایا جائے اور جرائم پیشہ عناصر کی نگرانی مؤثر انداز میں کی جائے تاکہ شہریوں کے جان و مال کا تحفظ یقینی بنایا جا سکے۔
نوشہرہ ورکاں میں بھی کھلی کچہری کا انعقاد
ریجنل پولیس آفیسر نے ایس ڈی پی او آفس نوشہرہ ورکاں کا معائنہ کیا اور وہاں کھلی کچہری کا انعقاد کرکے شہریوں کے مسائل سنے۔ اس موقع پر انہوں نے پولیس افسران کو ہدایت کی کہ شہریوں کے ساتھ خوش اخلاقی اور عزت و احترام سے پیش آیا جائے، ان کی شکایات کو ترجیحی بنیادوں پر سنا جائے اور ہر درخواست پر میرٹ کے مطابق فوری کارروائی عمل میں لائی جائے۔
شہریوں کو فوری انصاف کی فراہمی اولین ترجیح
آر پی او خرم شہزاد حیدر وڑائچ نے کہا کہ شہریوں کے جان و مال کا تحفظ اور انہیں فوری و میرٹ پر انصاف کی فراہمی پولیس کی اولین ذمہ داری ہے۔ تھانوں میں آنے والے شہریوں کے ساتھ عزت و احترام سے پیش آنا اور ان کے مسائل کا بروقت ازالہ پولیس کی ترجیحات میں شامل ہے۔
انہوں نے مزید کہا کہ جرائم کے خاتمے، مؤثر تفتیش اور جرائم پیشہ عناصر کے خلاف بلاامتیاز کارروائی میں کسی قسم کی کوتاہی برداشت نہیں کی جائے گی۔ پولیس افسران کو ہدایت کی گئی کہ پولیسنگ کے معیار کو بہتر بنانے، عوامی اعتماد میں اضافے اور امن و امان کے قیام کے لیے تمام دستیاب وسائل مؤثر انداز میں بروئے کار لائے جائیں۔
