امریکی اخبار وال اسٹریٹ جرنل کی رپورٹ کے مطابق امریکی صدر ڈونلڈ ٹرمپ نے اپنے مشیروں کو آگاہ کیا ہے کہ وہ ایران کے خلاف کسی نئی فوجی مہم کے آغاز کے خواہاں نہیں۔ رپورٹ میں بتایا گیا ہے کہ ٹرمپ کا کہنا ہے کہ جب تک ایران امریکی فوجیوں یا مفادات پر براہِ راست حملہ نہیں کرتا، امریکا جنگی کارروائی سے گریز کرے گا۔
رپورٹ کے مطابق ٹرمپ انتظامیہ مشرقِ وسطیٰ میں کشیدگی کو مزید بڑھانے کے بجائے سفارتی کوششوں کو ترجیح دے رہی ہے اور تنازع کے حل کے لیے مذاکرات اور سیاسی رابطوں کو بہتر راستہ سمجھتی ہے۔
دوسری جانب عرب میڈیا میں شائع ہونے والی رپورٹس میں ایک اسرائیلی کاروباری شخصیت کے حوالے سے دعویٰ کیا گیا ہے کہ امریکی صدر اور اسرائیلی وزیرِ اعظم بنیامین نیتن یاہو کے درمیان حالیہ دنوں میں سخت نوعیت کی بات چیت ہوئی۔ دعوے کے مطابق ٹرمپ نے اپنے مطالبات پورے نہ ہونے کی صورت میں نیتن یاہو کے خلاف سخت اقدامات کی دھمکی دی۔
آبنائے ہرمز میں بحری نقل و حرکت بحال کرنے کا اعلان، ٹرمپ نے ناکہ بندی ختم کرنے کا عندیہ دے دیا
رپورٹس میں یہ بھی کہا گیا ہے کہ نیتن یاہو کے بیٹے یائر نیتن یاہو کی امریکا میں موجودگی اور خاندان کے مالی اثاثوں سے متعلق بھی سخت مؤقف اختیار کیا گیا۔ مزید دعویٰ کیا گیا ہے کہ ٹرمپ نے سارا نیتن یاہو سے رابطہ کرکے اپنے شوہر کو مطالبات تسلیم کرنے پر آمادہ کرنے کا پیغام دیا۔
اسرائیلی کاروباری شخصیت کے مطابق ان پیش رفتوں کے بعد سارا نیتن یاہو نے وزیرِ اعظم پر دباؤ بڑھایا، جس کے نتیجے میں بنیامین نیتن یاہو نے بعد ازاں صدر ٹرمپ سے دوبارہ رابطہ کیا۔
