تھانہ صدر سرائے عالمگیر کی حدود میں واقع علاقے کھوہار کی پبی میں دو نوجوانوں کی لاشیں برآمد ہونے سے علاقے میں شدید خوف و ہراس پھیل گیا۔ ابتدائی معلومات کے مطابق دونوں نوجوانوں کو فائرنگ کر کے قتل کیا گیا، جب کہ واقعے کی وجوہات جاننے کے لیے پولیس نے تحقیقات کا آغاز کر دیا ہے۔
پولیس کے مطابق مقتولین کی شناخت شاہزیب سلیم ولد محمد سلیم، سکنہ کھوہار، اور زین ولد صفدر، سکنہ مہے خورد کے نام سے ہوئی ہے۔ دونوں نوجوانوں کی لاشیں ایک ویران مقام سے ملی ہیں، جن پر گولیوں کے واضح نشانات پائے گئے، جس سے یہ بات سامنے آئی ہے کہ قتل انتہائی قریب سے کیا گیا۔
پولیس حکام نے بتایا کہ مقتول زین کے اغواء کا مقدمہ پہلے ہی تھانہ سٹی سرائے عالمگیر میں درج تھا، جس کی مختلف پہلوؤں سے تفتیش جاری تھی۔ اس پس منظر میں پولیس واقعے کو اغواء اور بعد ازاں قتل کے زاویے سے بھی دیکھ رہی ہے، تاہم حتمی رائے تفتیش مکمل ہونے کے بعد ہی سامنے آئے گی۔
واقعے کی اطلاع ملتے ہی پولیس کی سینئر کمانڈ بھاری نفری کے ہمراہ فوری طور پر جائے وقوعہ پر پہنچ گئی اور علاقے کو گھیرے میں لے کر شواہد اکٹھے کرنے کا عمل شروع کیا۔ پنجاب فرانزک سائنس ایجنسی کی ٹیم کو بھی موقع پر طلب کیا گیا، جو کرائم سین سے اہم شواہد حاصل کرنے میں مصروف رہی۔
مقامی پولیس نے دونوں لاشوں کو تحویل میں لے کر پوسٹ مارٹم کے لیے ہسپتال منتقل کر دیا، جبکہ ورثاء کی درخواست پر مقدمہ درج کر کے قانونی کارروائی کا باقاعدہ آغاز کر دیا گیا ہے۔ پولیس کا کہنا ہے کہ پوسٹ مارٹم رپورٹ اور فرانزک شواہد تفتیش میں اہم کردار ادا کریں گے۔
ڈی پی او گجرات رانا عمر فاروق نے واقعے کا سختی سے نوٹس لیتے ہوئے ملزمان کی فوری گرفتاری کے احکامات جاری کر دیے ہیں۔ ان کے مطابق ملزمان کو ٹریس کرنے کے لیے خصوصی پولیس ٹیمیں تشکیل دے دی گئی ہیں اور مختلف پہلوؤں سے تحقیقات کی جا رہی ہیں۔ ڈی پی او گجرات کا کہنا تھا کہ واقعے میں ملوث عناصر کو جلد گرفتار کر کے قانون کے کٹہرے میں لایا جائے گا۔
مزید تفتیش کے دوران پولیس نے انکشاف کیا ہے کہ مقتول شاہزیب سلیم اقدامِ قتل اور ناجائز اسلحہ رکھنے سمیت مجموعی طور پر سات مقدمات میں نامزد تھا، جس کے باعث واقعے کو ذاتی دشمنی یا جرائم پیشہ گروہوں کے درمیان تصادم کے تناظر میں بھی دیکھا جا رہا ہے۔ پولیس کے مطابق تمام ممکنہ پہلوؤں پر باریک بینی سے تفتیش جاری ہے اور جلد حقائق سامنے آ جائیں گے۔
