کراچی کے علاقے عزیزآباد میں ایک شادی کی تقریب اس وقت میدان جنگ بن گئی جب دلہا اور دلہن کے رشتہ دار آپس میں الجھ پڑے۔ معمولی تلخ کلامی نے شدت اختیار کی اور مہمانوں نے ایک دوسرے پر حملے شروع کر دیے، حتیٰ کہ کرسیاں بھی چل گئیں۔
لڑائی کی ویڈیو منظرِ عام پر
واقعے کی سی سی ٹی وی فوٹیج منظر عام پر آ گئی ہے، جس میں دیکھا جا سکتا ہے کہ دلہا اور دلہن کے خاندانوں کے درمیان پہلے تلخ جملوں کا تبادلہ ہوا، جس کے بعد ہاتھا پائی شروع ہو گئی۔ فوٹیج میں افراد کو ایک دوسرے پر کرسیاں پھینکتے ہوئے بھی دیکھا گیا۔
پولیس پر بھی حملہ، اہلکار زخمی
صورتحال بگڑنے پر شادی ہال انتظامیہ نے پولیس کو طلب کیا، تاہم مشتعل افراد نے پولیس اہلکاروں پر بھی حملہ کر دیا۔ جھگڑے میں ایک کانسٹیبل حافظ عثمان زخمی ہو گیا۔
گرفتاریاں اور مقدمہ درج
پولیس نے موقع پر کارروائی کرتے ہوئے تین افراد — یونس مسیح، ہیری اور ہیری ولد وکٹر — کو گرفتار کر لیا، جبکہ 30 سے 40 نامعلوم افراد کے خلاف عزیزآباد تھانے میں مقدمہ درج کر لیا گیا ہے۔ ایف آئی آر میں ہنگامہ آرائی، توڑ پھوڑ اور پولیس اہلکار پر تشدد کی دفعات شامل کی گئی ہیں۔
