34
اسلام آباد، پاکستان تحریک انصاف کے چیئرمین بیرسٹر گوہر علی خان نے واضح کیا ہے کہ پی ٹی آئی کے بانی عمران خان کے ساتھ کسی قسم کی کوئی مفاہمت یا ڈیل نہیں ہوئی۔
اسلام آباد میں پارلیمنٹ ہاؤس کے باہر صحافیوں سے گفتگو کرتے ہوئے بیرسٹر گوہر نے کہا کہ انہوں نے عمران خان کی نجی باتوں کو ہمیشہ راز رکھا اور ان کی دی گئی ذمہ داری کو ایمانداری سے نبھایا۔
انہوں نے مزید کہا کہ عمران خان کے اہلِ خانہ تمام حالات سے مکمل طور پر باخبر ہیں اور ان کے بیٹے قاسم سلیمان مسلسل اپنے والد سے رابطے میں ہیں، انہوں نے واضح کیا کہ عمران خان کے اہلِ خانہ بھی کسی ڈیل کے امکان کو مسترد کر چکے ہیں۔
چیئرمین پی ٹی آئی کا کہنا تھا کہ ملک میں سیاسی بحرانوں کا حل صرف اور صرف مذاکرات سے ممکن ہے اور تمام فریقین کو اس سمت میں سنجیدگی سے سوچنا ہوگا۔
بیرسٹر گوہر نے ایک بار پھر زور دیا کہ عمران خان کی رہنمائی اور موقف مکمل طور پر واضح ہے اور پارٹی کی تمام سرگرمیاں ان کی ہدایات کی روشنی میں جاری ہیں۔
