ضلع جہلم میں مختلف سرکاری محکموں کی کارکردگی، عوامی خدمات کی فراہمی اور کلیدی کارکردگی اشاریوں (KPIs) کا جائزہ لینے کے لیے ایک اہم اجلاس منعقد ہوا۔
یہ اجلاس ڈپٹی کمشنر جہلم میر رضا اوزگن کی زیر صدارت ہوا جس میں ضلعی سطح کے مختلف محکموں کے افسران نے شرکت کی۔
اجلاس میں صحت، تعلیم، ریونیو اور دیگر سرکاری اداروں کی مجموعی کارکردگی، جاری منصوبوں اور عوامی سہولیات کی فراہمی سے متعلق پیش رفت کا تفصیلی جائزہ لیا گیا۔ متعلقہ افسران نے اپنے شعبوں کی کارکردگی، درپیش مسائل اور جاری اقدامات پر بریفنگ دی جبکہ انتظامی بہتری کے لیے مختلف تجاویز بھی پیش کی گئیں۔
جہلم: گندم کی خریداری اور ذخیرہ اندوزی کے خلاف مہم کو مزید فعال بنایا جائے گا، سنیہ صافی
ڈپٹی کمشنر نے اجلاس سے خطاب کرتے ہوئے ہدایت کی کہ تمام محکمے مقررہ اہداف کے حصول اور KPIز پر مؤثر عملدرآمد کو یقینی بنائیں۔ ان کا کہنا تھا کہ عوامی خدمات کی بروقت فراہمی، شفافیت اور بہتر گورننس ضلعی انتظامیہ کی اولین ترجیح ہے۔
انہوں نے مزید کہا کہ تمام ادارے باہمی رابطے کو مضبوط بنائیں، مانیٹرنگ سسٹم کو فعال کریں اور رپورٹنگ کے عمل کو بہتر بنائیں تاکہ حکومتی پالیسیوں پر مؤثر عملدرآمد ممکن ہو سکے اور عوام کو زیادہ سے زیادہ ریلیف فراہم کیا جا سکے۔
