10 سالہ سارہ قتل کیس کے تینوں ملزمان ویڈیو لنک کے ذریعے عدالت میں پیش ہوگئے۔
لندن، 10 سالہ سارہ شریف قتل مقدمے کے تینوں ملزمان عرفان شریف ان کی زوجہ اور فیصل شریف بذریعہ ویڈیو لنک برطانوی عدالت میں پیش ہوگئے۔
غیر ملکی میڈیا کے مطابق سارہ شریف کے مبینہ قتل کیس کا آغاز 7 اکتوبر کو ہو گا جبکہ مقدمہ 14 اکتوبر کو جیوری کے سامنے پیش کیا جائے گا۔
یاد رہے کہ ڈپٹی سپرنٹنڈنٹ برطانوی پولیس مارک چیپ مین نے کہا کہ تینوں افراد سارہ کی لاش ملنے سے چند گھنٹے پہلے پاکستان روانہ ہوگئے تھے، سارہ سے متعلق اطلاع پاکستان سے اس کے والد نے ایمرجنسی نمبر پر دی۔
مارک چیپ مین نے کہا کہ سارہ کی پوسٹ مارٹم رپورٹ کے مطابق جسم پر زخم کے نشان پرانے تھے، پوسٹ مارٹم رپورٹ کے بعد پولیس تفتیش کی نوعیت تبدیل ہو گئی تھی۔
واضح رہے کہ 10 سالہ بچی سارہ شریف کی لاش 10 اگست کو انگلینڈ کے شہر ووکنگ میں ان کے گھر سے ملی تھی، سارہ کے والد عرفان شریف، سوتیلی ماں اور چچا فیصل شریف قتل میں ملوث ہونے سے انکار کرتے رہے ہیں۔
