ڈپٹی کمشنر گجرات خرم شہزاد نے رات ایک بجے تحصیل ہیڈکوارٹر (ٹی ایچ کیو) اسپتال اور ٹراما سینٹر لالہ موسیٰ کا اچانک دورہ کیا اور ڈاکٹروں سمیت طبی عملے کی حاضری، مریضوں کو فراہم کی جانے والی سہولیات اور ادویات کی دستیابی کا جائزہ لیا۔ انہوں نے اسپتال انتظامیہ کو ہدایت کی کہ ایمرجنسی سمیت تمام شعبوں میں علاج معالجے کی سہولیات بلاتعطل فراہم کی جائیں۔
ایڈیشنل ڈپٹی کمشنر اور اسسٹنٹ کمشنر بھی ہمراہ تھے
ڈپٹی کمشنر خرم شہزاد کے ہمراہ ایڈیشنل ڈپٹی کمشنر ریونیو احمد ہارون، اسسٹنٹ کمشنر گجرات عبدالقدیر زرکون اور ایم ایس ٹی ایچ کیو اسپتال بھی موجود تھے۔
دورے کے دوران ڈپٹی کمشنر نے ڈاکٹروں اور پیرامیڈیکل اسٹاف کی حاضری چیک کی اور مختلف شعبوں کا معائنہ کیا۔ انہوں نے میڈیکو لیگل کاؤنٹر، ایمرجنسی بلاک، پارکنگ اور فارمیسی سمیت اسپتال کے دیگر حصوں میں انتظامات کا جائزہ لیا۔
مریضوں اور لواحقین سے طبی سہولیات کے بارے میں دریافت
ڈپٹی کمشنر نے اسپتال میں زیر علاج مریضوں اور ان کے لواحقین سے ملاقات بھی کی اور ان سے فراہم کی جانے والی طبی سہولیات، ادویات کی دستیابی اور علاج معالجے کے انتظامات کے بارے میں دریافت کیا۔
انہوں نے مریضوں سے یہ بھی جاننے کی کوشش کی کہ انہیں علاج کے دوران کسی قسم کی مشکلات کا سامنا تو نہیں کرنا پڑ رہا۔
ڈپٹی کمشنر گجرات کا موضع کوٹ غلام کا دورہ، دریا کے کٹاؤ پر فوری رپورٹ طلب
اسپتال انتظامیہ کو سہولیات یقینی بنانے کی ہدایت
ڈپٹی کمشنر خرم شہزاد نے اسپتال انتظامیہ کو ہدایت کی کہ ایمرجنسی سمیت تمام شعبوں میں طبی سہولیات کی مسلسل فراہمی یقینی بنائی جائے۔
انہوں نے واضح کیا کہ ڈاکٹروں اور پیرامیڈیکل اسٹاف کی بروقت حاضری، ادویات کی دستیابی اور مریضوں کو مناسب طبی سہولیات کی فراہمی پر خصوصی توجہ دی جائے تاکہ کسی بھی ہنگامی صورتحال میں مریضوں کو بروقت علاج میسر آسکے۔
رات گئے اچانک دورے کا مقصد اسپتال میں طبی سہولیات اور انتظامی امور کی صورت حال کا جائزہ لینا تھا۔
