گجرات میں ضلعی انتظامیہ نے شہر کے اہم تجارتی مراکز مسلم بازار اور کٹڑہ بازار میں تجاوزات کے خلاف کارروائی کرتے ہوئے دکانداروں کو سرکاری راستوں پر سامان رکھنے سے گریز کرنے کی ہدایت کی ہے۔ آپریشن ڈپٹی کمشنر خرم شہزاد کی ہدایات پر پنجاب انفورسمنٹ اینڈ ریگولیٹری اتھارٹی (پیرا) اور متعلقہ انتظامیہ نے مشترکہ طور پر کیا۔
ایڈیشنل ڈپٹی کمشنر انفورسمنٹ کی نگرانی میں کارروائی
تفصیلات کے مطابق ایڈیشنل ڈپٹی کمشنر انفورسمنٹ خیزران علی کی نگرانی میں پیرا کے ضلعی افسران اور متعلقہ انتظامی اہلکاروں نے مسلم بازار اور کٹڑہ بازار کا دورہ کیا، جہاں دکانوں کے باہر قائم تجاوزات اور عوامی گزرگاہوں کی صورتحال کا جائزہ لیا گیا۔
اس موقع پر بازاروں میں پیدل چلنے والوں اور دیگر شہریوں کی آمدورفت میں رکاوٹ بننے والی تجاوزات کے خاتمے کے لیے کارروائی عمل میں لائی گئی۔
پیرا اہلکاروں نے دکانداروں کو ہدایت کی کہ وہ اپنی دکانوں کے باہر غیر ضروری سامان رکھنے سے گریز کریں اور سرکاری راستوں کو ہر قسم کی رکاوٹ سے پاک رکھیں۔
گجرات کے داخلی و خارجی راستوں کی خوبصورتی کا منصوبہ، انتظامیہ کا دورہ
شہریوں کی آمدورفت میں آسانی ترجیح
ضلعی انتظامیہ کے مطابق بازاروں میں تجاوزات کے باعث شہریوں کو آمدورفت میں مشکلات کا سامنا کرنا پڑتا ہے، جبکہ تجارتی مراکز میں ٹریفک اور پیدل چلنے والوں کی روانی بھی متاثر ہوتی ہے۔
انتظامیہ کا کہنا ہے کہ عوامی راستوں کو کھلا رکھنے اور بازاروں میں آمدورفت بہتر بنانے کے لیے انسدادِ تجاوزات کارروائیاں جاری رکھی جائیں گی۔
دکانداروں سے بھی اپیل کی گئی ہے کہ وہ انتظامیہ کی ہدایات پر عمل کریں اور اپنی دکانوں کے سامان کو مقررہ حدود تک محدود رکھیں تاکہ شہریوں کو خریداری اور آمدورفت کے دوران مشکلات کا سامنا نہ کرنا پڑے۔
ضلعی انتظامیہ کے مطابق ان اقدامات کا بنیادی مقصد شہر کے تجارتی مراکز میں نظم و ضبط برقرار رکھنا اور عوام کو بہتر شہری سہولیات فراہم کرنا ہے۔
