نوید احمد نے مختلف علاقوں میں صفائی، سیوریج منصوبوں، سڑکوں کی بحالی اور بیوٹیفکیشن کے کاموں کا معائنہ کیا، متعلقہ محکموں کو بروقت تکمیل کی ہدایات جاری کردیں۔
گوجرانوالہ: وزیراعلیٰ پنجاب مریم نواز شریف کے گڈ گورننس انیشیٹیوز کے تحت ڈپٹی کمشنر گوجرانوالہ نوید احمد کے علی الصبح شہر کے مختلف علاقوں کے اچانک دوروں کا سلسلہ جاری ہے۔ اس موقع پر انہوں نے شہریوں کو فراہم کی جانے والی بنیادی سہولیات، صفائی ستھرائی اور جاری ترقیاتی و بحالی کے منصوبوں کا موقع پر جائزہ لیا۔
ڈپٹی کمشنر نے پکا فتومنڈ بازار، جناح روڈ، کچا ایمن آباد روڈ پپلی والا چوک، بہاری کالونی، شادمان کالونی، دستگیر سکول روڈ اور کشمیر روڈ کا دورہ کیا۔ انہوں نے مختلف مقامات پر صفائی، سڑکوں کی بحالی، سیوریج منصوبوں اور دیگر شہری سہولیات کا معائنہ کیا اور متعلقہ افسران کو ضروری ہدایات جاری کیں۔
سیوریج منصوبوں کے بعد سڑکوں کی بحالی کا جائزہ
پکا فتومنڈ بازار، جناح روڈ اور کچا ایمن آباد روڈ پر سیوریج منصوبوں کے بعد جاری روڈ ریسٹوریشن کے کام کا معائنہ کرتے ہوئے ڈپٹی کمشنر نے واسا حکام کو کام کی رفتار مزید تیز کرنے کی ہدایت کی۔
انہوں نے کہا کہ بحالی کے کام میں معیار پر کسی قسم کا سمجھوتہ نہیں ہونا چاہیے اور منصوبوں کو مقررہ مدت کے اندر مکمل کیا جائے۔ ڈپٹی کمشنر نے متعلقہ حکام کو ہدایت کی کہ یہ کام 31 اگست کی مقررہ ڈیڈ لائن سے قبل مکمل کیے جائیں تاکہ شہریوں کو آمدورفت میں درپیش مشکلات کا جلد از جلد خاتمہ ممکن ہو۔
12 ربیع الاول کے پیش نظر خصوصی صفائی آپریشن
ڈپٹی کمشنر نوید احمد نے جناح روڈ اور پکا فتومنڈ بازار میں ستھرا پنجاب پروگرام کے تحت جاری صفائی انتظامات کا بھی جائزہ لیا۔ انہوں نے 12 ربیع الاول کے پیش نظر خصوصی صفائی آپریشن کو مزید مؤثر بنانے کی ہدایت کی۔
انہوں نے متعلقہ حکام کو ہدایت کی کہ اہم شاہراہوں، بازاروں اور عوامی مقامات پر صفائی کے انتظامات کو بہتر بنایا جائے اور عید میلاد النبی ﷺ کے موقع پر شہریوں کو صاف ستھرا ماحول فراہم کرنے کے لیے خصوصی توجہ دی جائے۔
ڈپٹی کمشنر گوجرانوالہ کے سرکاری اسکولوں کے ہنگامی دورے جاری
ناقص صفائی پر فوری بہتری کے احکامات
بہاری کالونی، شادمان کالونی اور دستگیر سکول روڈ کے دورے کے دوران صفائی کی صورتحال تسلی بخش نہ ہونے پر ڈپٹی کمشنر نے فوری نوٹس لیا اور متعلقہ حکام کو صفائی کے معیار میں فوری بہتری لانے کے احکامات جاری کیے۔
انہوں نے واضح کیا کہ شہری علاقوں میں صفائی کے حوالے سے کسی قسم کی غفلت برداشت نہیں کی جائے گی اور فیلڈ میں صفائی کے انتظامات کی مؤثر نگرانی یقینی بنائی جائے۔
سڑکوں کے کھڈے فوری پُر کرنے کی ہدایت
دستگیر سکول روڈ اور کشمیر روڈ پر سڑکوں کی صورتحال کا جائزہ لیتے ہوئے ڈپٹی کمشنر نے متعلقہ محکموں کو کھڈے فوری پُر کرنے کی ہدایت کی۔ انہوں نے کہا کہ سڑکوں کی خستہ حالی شہریوں کے لیے مشکلات کے ساتھ ساتھ ٹریفک کی روانی اور محفوظ آمدورفت کو بھی متاثر کرسکتی ہے، اس لیے ضروری مرمتی کام میں تاخیر نہیں ہونی چاہیے۔
کشمیر روڈ پر بیوٹیفکیشن کا معائنہ
کشمیر روڈ پیپلز کالونی کے مرکزی روڈ ڈیوائیڈر پر جاری بیوٹیفکیشن اور پینٹ کے کام کا بھی ڈپٹی کمشنر نے معائنہ کیا۔ انہوں نے کام کے معیار اور پیش رفت کا جائزہ لیتے ہوئے متعلقہ حکام کو ہدایت کی کہ شہر کی خوبصورتی کے لیے جاری منصوبوں کو بھی مقررہ معیار کے مطابق مکمل کیا جائے۔
اس موقع پر نوید احمد نے کہا کہ شہریوں کو صاف ستھرا ماحول، بہتر میونسپل سہولیات اور محفوظ آمدورفت فراہم کرنا ضلعی انتظامیہ کی اولین ترجیحات میں شامل ہے۔
انہوں نے مزید کہا کہ ترقیاتی، بحالی، صفائی اور بیوٹیفکیشن کے تمام منصوبے مقررہ مدت میں اعلیٰ معیار کے ساتھ مکمل کیے جائیں۔ انہوں نے واضح کیا کہ عوامی سہولیات سے متعلق کاموں میں غفلت یا کوتاہی کسی صورت برداشت نہیں کی جائے گی۔
