بالی ووڈ کے معروف اداکار سلمان خان اور ان کی بہن الویرا خان اگنی ہوتری کو بینگ ہیومن جیولری شوروم سے متعلق تقریباً 3 کروڑ بھارتی روپے کے مالی تنازع کے کیس میں چنڈی گڑھ کی ضلعی عدالت نے طلب کر لیا ہے۔ عدالت نے دونوں سمیت دیگر نامزد افراد کو 5 اکتوبر کو پیش ہونے کی ہدایت کی ہے۔
بھارتی میڈیا رپورٹس کے مطابق یہ مقدمہ چنڈی گڑھ کے کاروباری شخص ارون گپتا کی جانب سے دائر کردہ فوجداری شکایت پر مبنی ہے۔ شکایت کنندہ کے مطابق انہوں نے بینگ ہیومن جیولری شوروم کے قیام کے لیے تقریباً 3 کروڑ بھارتی روپے کی سرمایہ کاری کی، تاہم انہیں معاہدے کے تحت مطلوبہ تعاون، تشہیری سہولت اور بروقت جیولری کی فراہمی نہیں مل سکی۔
ارون گپتا نے مؤقف اختیار کیا کہ انہیں یقین دہانی کرائی گئی تھی کہ شوروم کی افتتاحی تقریب میں سلمان خان خود شرکت کریں گے، تاہم ان کی جگہ اداکار آیوش شرما تقریب میں شریک ہوئے۔ شکایت کنندہ کے مطابق بعد میں جیولری کی سپلائی بھی متاثر ہوئی اور متعلقہ دفتر بند ہونے کے باعث معاملہ مزید پیچیدہ ہوگیا۔
صحت سے متعلق افواہوں پر سلمان خان کا دلچسپ ردعمل، نئی تصاویر شیئر کردیں
رپورٹس کے مطابق یہ تنازع پہلی مرتبہ 2021 میں سامنے آیا تھا، جب چنڈی گڑھ پولیس نے سلمان خان، الویرا خان اور دیگر افراد کو پوچھ گچھ کے لیے طلب کیا تھا۔ اب تقریباً پانچ سال بعد معاملہ عدالتی کارروائی کے مرحلے میں داخل ہو گیا ہے۔
دوسری جانب بینگ ہیومن فاؤنڈیشن نے شکایت میں عائد الزامات کو مسترد کرتے ہوئے مؤقف اختیار کیا ہے کہ متعلقہ معاہدہ ایک لائسنس یافتہ کمپنی اور شکایت کنندہ کے درمیان ہوا تھا، جبکہ سلمان خان، الویرا خان اور فاؤنڈیشن براہِ راست اس معاہدے کا حصہ نہیں تھے۔
