آزاد کشمیر میں انتخابات کے تیسرے مرحلے کے دوران ضلع پونچھ اور ضلع پلندری کے تمام انتخابی حلقوں میں 10 اگست کو ہونے والی پولنگ ملتوی کر دی گئی ہے۔
آزاد جموں و کشمیر الیکشن کمیشن کے ترجمان کے مطابق پولنگ ملتوی کرنے کا فیصلہ امن و امان کی صورتحال، بعض سیاسی رہنماؤں اور امیدواروں کی درخواستوں سمیت متعلقہ اداروں سے موصول ہونے والی رپورٹس کا جائزہ لینے کے بعد کیا گیا۔
ترجمان نے واضح کیا کہ پونچھ اور پلندری کے انتخابی حلقوں میں 10 اگست کو ووٹنگ نہیں ہوگی، تاہم ضلع باغ کے تین اور ضلع حویلی کے ایک انتخابی حلقے میں پولنگ مقررہ شیڈول کے مطابق جاری رہے گی۔
الیکشن کمیشن کے مطابق ملتوی کیے گئے حلقوں کے لیے نئی تاریخ اور نظرثانی شدہ انتخابی شیڈول کا اعلان صورتحال کا جائزہ لینے کے بعد کیا جائے گا۔
کمیشن کا کہنا ہے کہ پولنگ ملتوی کرنے کا مقصد انتخابات کو آزادانہ، منصفانہ، شفاف اور پرامن ماحول میں یقینی بنانا ہے، جبکہ انتخابی عمل پر عوامی اعتماد برقرار رکھنا اولین ترجیح ہے۔
