ٹیکنالوجی کمپنی ایپل کے بارے میں اطلاعات سامنے آئی ہیں کہ وہ ایک نئی ویئرایبل ڈیوائس، سمارٹ رنگ، کی تیاری پر کام کر رہی ہے۔ تاہم کمپنی کی جانب سے اس منصوبے کی تاحال باضابطہ تصدیق نہیں کی گئی۔
رپورٹس کے مطابق سمارٹ رنگ کا منصوبہ اس وقت ابتدائی تحقیق اور ترقی کے مرحلے میں ہے۔ اس کی ممکنہ خصوصیات، ڈیزائن، قیمت یا متوقع لانچ کے حوالے سے ابھی کوئی مستند معلومات سامنے نہیں آئی ہیں۔
ذرائع کا کہنا ہے کہ ایپل اس کے علاوہ مصنوعی ذہانت سے لیس سمارٹ چشمے، سمارٹ پینڈنٹ اور کیمروں سے مزین نئی نسل کے ایئرپوڈز پرو پر بھی کام کر رہا ہے، جس سے ظاہر ہوتا ہے کہ کمپنی ویئرایبل ٹیکنالوجی کے شعبے میں اپنی موجودگی مزید مضبوط بنانے کی منصوبہ بندی کر رہی ہے۔
ایپل کے متوقع آئی فون 17 ای کی ممکنہ قیمت لیک، صارفین کیلئے اچھی خبر
اگر ایپل مستقبل میں سمارٹ رنگ متعارف کراتا ہے تو اسے سام سنگ گلیکسی رنگ، اوورا رنگ اور الٹرا ہیومن رنگ ایئر جیسے پہلے سے موجود حریفوں کا سامنا کرنا ہوگا۔
واضح رہے کہ سمارٹ رنگ سے متعلق تمام معلومات اس وقت غیر مصدقہ رپورٹس اور افواہوں پر مبنی ہیں، جبکہ ایپل نے اس حوالے سے کوئی سرکاری اعلان نہیں کیا۔
