اسلام آباد: برطانیہ نے پاکستانی سیاحوں کے لیے ویزا کے حصول کا طریقہ کار جدید بناتے ہوئے نیا ای ویزا سسٹم متعارف کرا دیا ہے، جس کے تحت اب پاسپورٹ پر روایتی ویزا اسٹیکر نہیں لگایا جائے گا بلکہ ویزا کی منظوری مکمل طور پر ڈیجیٹل طریقے سے فراہم کی جائے گی۔
برطانوی حکومت کے ادارے کے مطابق درخواست گزار اب آن لائن ویزا فارم جمع کرائیں گے اور بایومیٹرک تصدیق کے لیے ویزا ایپلی کیشن سینٹر کا دورہ کریں گے، تاہم انہیں پاسپورٹ واپس لینے کے لیے دوبارہ سینٹر جانے کی ضرورت نہیں ہوگی۔ کامیاب امیدواروں کو ویزا کی تصدیق ای میل کے ذریعے موصول ہوگی اور ان کا ڈیجیٹل ویزا ریکارڈ آن لائن اکاؤنٹ میں محفوظ کر دیا جائے گا۔
پاکستان میں تعینات برطانوی ہائی کمشنر نے اس اقدام کو خوش آئند قرار دیتے ہوئے کہا کہ اس نظام سے نہ صرف درخواست کا عمل آسان اور تیز ہوگا بلکہ امیگریشن اسٹیٹس کو زیادہ محفوظ اور قابل رسائی بنایا جا سکے گا۔ ان کے مطابق ڈیجیٹل ریکارڈ کے باعث دستاویزات کے ضائع ہونے یا خراب ہونے کے امکانات بھی کم ہو جائیں گے۔
پاکستان اور برطانیہ کے تجارتی تعلقات میں تاریخی پیش رفت
حکام کا کہنا ہے کہ ای ویزا سسٹم جدید ٹیکنالوجی کے استعمال کی جانب اہم قدم ہے جس سے وقت اور اخراجات کی بچت ہوگی۔ اس سہولت سے سیاحت، تعلیم اور کاروبار کی غرض سے برطانیہ جانے والے پاکستانی شہریوں کو نمایاں فائدہ پہنچے گا اور دونوں ممالک کے درمیان عوامی روابط کو مزید فروغ ملے گا۔
