اسلام آباد میں گفتگو کرتے ہوئے خیبرپختونخوا کے معاونِ خصوصی برائے اطلاعات شفیع جان نے کہا ہے کہ بانی پی ٹی آئی کی رہائی صرف عوامی دباؤ کے ذریعے ہی ممکن ہے۔ ان کا کہنا تھا کہ موجودہ حالات میں پارٹی کے پاس سڑکوں پر نکلنے کے سوا کوئی مؤثر راستہ باقی نہیں بچا۔
نجی ٹی وی کے پروگرام دنیا مہر بخاری کے ساتھ میں گفتگو کرتے ہوئے شفیع جان نے کہا کہ اس بار احتجاجی تحریک محض علامتی نہیں ہوگی بلکہ اس کے واضح نتائج حاصل کرنے کی کوشش کی جائے گی۔ انہوں نے بتایا کہ پارٹی رہنما سہیل آفریدی کی قیادت میں اسٹریٹ موومنٹ کی تیاری مکمل کی جا رہی ہے اور کنٹینر بھی تیار ہے۔ ان کے مطابق جب احتجاج کا آغاز ہوگا تو اس کا رخ حالات کے مطابق کسی بھی سمت اختیار کر سکتا ہے۔
شفیع جان نے واضح کیا کہ پارٹی کسی غیر قانونی اقدام کا ارادہ نہیں رکھتی اور نہ ہی جیل توڑنے جیسے کسی عمل کا سوچا جا رہا ہے۔ تاہم انہوں نے کہا کہ رہائی کے لیے دباؤ بڑھانے کی حکمت عملی پر کام جاری ہے اور اسے منظم انداز میں آگے بڑھایا جائے گا۔ ان کا کہنا تھا کہ کارکنان اس بار بھرپور تیاری کے ساتھ میدان میں اتریں گے۔
عمران خان کو آنکھوں کے علاج کے لیے پمز منتقل، دوسری اینٹی وی ای جی ایف خوراک دے کر ڈسچارج
انہوں نے مزید کہا کہ پارٹی قیادت سمجھتی ہے کہ سیاسی مسائل کا حل سیاسی جدوجہد میں ہی ہے، اس لیے عوامی طاقت کو متحرک کرنا ناگزیر ہو چکا ہے۔ شفیع جان کے مطابق اگر عوام سڑکوں پر نکل آئے تو سیاسی منظرنامہ تبدیل ہو سکتا ہے اور اسی دباؤ کے نتیجے میں بانی پی ٹی آئی کی رہائی کی راہ ہموار ہوگی۔
پارٹی رہنماؤں کا کہنا ہے کہ آئندہ دنوں میں احتجاجی شیڈول اور لائحہ عمل کا باضابطہ اعلان کیا جائے گا، جبکہ کارکنوں کو منظم رکھنے اور پرامن رہنے کی ہدایات بھی جاری کی جائیں گی۔
