کراچی: پولیس نے کراچی کے علاقے فیروز آباد میں ایک صنعت کار کے گھر سے چوری کرنے والے گھریلو ملازماؤں کے منظم گینگ کو گرفتار کر لیا ہے۔ خفیہ اطلاع پر کارروائی کے دوران پانچ خواتین کو حراست میں لیا گیا، جو گزشتہ نو برس سے ایک ہی بنگلے میں ملازمت کر رہی تھیں۔
ابتدائی تفتیش کے مطابق گینگ کی سرغنہ عروج نے گھر کے لاکر کی چابی چرا کر تین ہزار روپے میں اس کی نقل بنوائی اور منصوبہ بندی کے تحت چوری کا سلسلہ جاری رکھا۔ خواتین نے طویل عرصے کے دوران نقد رقم اور قیمتی اشیا چوری کیں۔
ایس ایس پی ایسٹ کے مطابق گرفتار خواتین کے قبضے سے لاکھوں روپے نقد اور متعدد موبائل فونز برآمد ہوئے۔ تفتیش کے دوران یہ بھی معلوم ہوا کہ چوری کی گئی رقم سے گینگ کی بعض رکنوں نے گھر، گاڑی اور موٹر سائیکل بھی خریدی۔ پولیس حکام نے کہا کہ یہ تمام اثاثے مشکوک ذرائع سے حاصل کیے گئے اور ان کی مزید جانچ جاری ہے۔
واقعے کا مقدمہ درج کر کے تحقیقات کا دائرہ وسیع کر دیا گیا ہے تاکہ یہ معلوم کیا جا سکے کہ آیا یہ گینگ دیگر گھروں میں بھی سرگرم تھا یا نہیں۔ گرفتار خواتین سے مزید تفتیش جاری ہے اور توقع ہے کہ اس کیس میں مزید اہم انکشافات سامنے آئیں گے۔
