واشنگٹن: وزیر خزانہ محمد اورنگزیب نے کہا ہے کہ پاکستان کو آئی ایم ایف سے 1.2 ارب ڈالر کی اگلی قسط دسمبر تک ملنے کی توقع ہے۔
وزیر خزانہ اس وقت دورہ امریکا پر ہیں جہاں انہوں نے 20 وزارتی اجلاس میں شرکت کی اور موسمیاتی تبدیلیوں کے نقصانات سے نمٹنے کے لیے "لاس اینڈ ڈیمیج فنڈ” کو فوری طور پر فعال کرنے پر زور دیا۔
محمد اورنگزیب نے انٹرنیشنل فنانس کارپوریشن کے مینیجنگ ڈائریکٹر مختار ڈیوپ سے ملاقات میں امید ظاہر کی کہ ایگزِم بینک جلد ریکوڈک منصوبے میں شمولیت اختیار کرے گا۔ انہوں نے جے پی مورگن کے سینئر وفد سے بھی ملاقات کی، جس میں دوطرفہ اقتصادی شراکت داری کو مزید فروغ دینے پر اتفاق کیا گیا۔
واشنگٹن میں پریس کانفرنس کرتے ہوئے وزیر خزانہ نے کہا کہ آئی ایم ایف ایگزیکٹو بورڈ جلد معاہدے کی منظوری دے گا اور پاکستان کو 31 دسمبر تک 1.2 ارب ڈالر کی قسط ملنے کی توقع ہے۔
انہوں نے واضح کیا کہ آئی ایم ایف پاکستان پر قومی مفاد کے خلاف کوئی شرط عائد نہیں کر سکتا۔ پروگرام کے تحت کی گئی اصلاحات نے معیشت کو استحکام دیا ہے، اور تمام اقدامات پاکستان کی اپنی معاشی ترجیحات کے مطابق ہیں۔
وزیر خزانہ نے مزید بتایا کہ امریکا کے ساتھ تجارتی و ٹیرف معاہدہ ایک سے دو ہفتوں میں متوقع ہے، جبکہ نیویارک کے روزویلٹ ہوٹل کی نجکاری سے متعلق فیصلہ بھی جلد کیا جائے گا۔
