سابق ویسٹ انڈیز کپتان کیرون پولارڈ نے کیریبیئن پریمیئر لیگ (سی پی ایل) 2025 کے ایک میچ میں شاندار کارکردگی کا مظاہرہ کیا ہے۔
انہوں نے ٹرینیباگو نائٹ رائیڈرز کی جانب سے کھیلتے ہوئے صرف 29 گیندوں پر 65 رنز بنائے، جن میں 2 چوکے اور 8 زوردار چھکے شامل تھے۔
38 سالہ پولارڈ نے اپنی اننگز کے دوران محض 8 گیندوں پر 7 چھکے لگائے، جس نے میدان میں موجود سبھی شائقین کو حیران کر دیا۔ انہوں نے نیویان بڈائسی اور وقار سلام خیل کے اوورز میں مسلسل چھکے جڑ کر اپنی طاقت کا مظاہرہ کیا۔ پولارڈ اور نیکولس پورن کے درمیان 90 رنز کی پارٹنرشپ نے میچ کا رخ مکمل طور پر موڑ دیا۔
پولارڈ نے صرف 21 گیندوں پر نصف سنچری مکمل کی اور وہ گزشتہ ہفتے ہی کرس گیل کے بعد دنیا کے دوسرے بلے باز بنے تھے جنہوں نے 14 ہزار ٹی ٹوئنٹی رنز بنائے ہیں۔
ٹی ٹوئنٹی کرکٹ میں سب سے زیادہ چھکے لگانے والوں کی فہرست میں بھی پولارڈ 950 چھکوں کے ساتھ کرس گیل کے بعد دوسرے نمبر پر ہیں۔
آسٹریلوی بولر مچل اسٹارک نے ٹی ٹوئنٹی انٹرنیشنل سے ریٹائرمنٹ کا اعلان کر دیا
اس میچ میں ان کی شاندار اننگز کی بدولت، شاہ رخ خان کی ملکیت میں شامل ٹرینیباگو نائٹ رائیڈرز نے سینٹ کٹس اینڈ نیویس پیٹریاٹس کو 12 رنز سے شکست دی۔
پیٹریاٹس مقررہ اوورز میں 167 رنز بنا سکے جبکہ ان کے آندرے فلیچر نے 54 گیندوں پر 67 رنز کی مزاحمتی اننگز کھیلی۔ کیرون پولارڈ کو بہترین کارکردگی پر مین آف دی میچ قرار دیا گیا۔
