وزیراعلیٰ پنجاب مریم نواز نے تھائی لینڈ کے تاجروں کو ٹیکسٹائل، زراعت، سیاحت اور ٹیکنالوجی میں سرمایہ کاری کی پیشکش کی اور باہمی تعاون پر زور دیا۔
لاہور، وزیراعلیٰ پنجاب مریم نواز شریف نے تھائی لینڈ کی کاروباری برادری کو پنجاب میں سرمایہ کاری کی دعوت دی ہے۔
تھائی لینڈ کے سابق وزیراعظم اور ٹیلی کمیونیکیشن کے شعبے کی معروف شخصیت تھکسان شینا وترا نے مریم نواز کے اعزاز میں عشائیہ تقریب کا اہتمام کیا، جس میں تھائی لینڈ کی کم عمر ترین سابق خاتون وزیراعظم پائیتونگترن شینا وترا نے بھی شرکت کی۔ تقریب میں دونوں جانب سے خیرسگالی کے جذبات اور پاکستان مسلم لیگ ن کے صدر محمد نواز شریف کے لیے نیک تمناؤں کا اظہار کیا گیا۔
تھکسان شینا وترا نے مریم نواز کے ترقیاتی وژن، انتظامی اقدامات اور عوامی فلاح کے منصوبوں کو سراہا، جبکہ مریم نواز نے تھائی قیادت کی اصلاحات اور معیشت کی ترقی میں اقدامات کو سراہا۔
مریم نواز نے کہا کہ پنجاب میں ٹیکسٹائل، زراعت، سیاحت اور ٹیکنالوجی کے شعبوں میں سرمایہ کاری کے لیے بہترین مواقع موجود ہیں اور تھائی کاروباری برادری یہاں کی فراہم کردہ مراعات سے فائدہ اٹھا سکتی ہے کیونکہ پنجاب علاقائی منڈیوں تک رسائی کا آسان ذریعہ ہے۔
مریم نواز کا جاپان میں ورلڈ ایکسپو 2025 کا دورہ، پاکستانی پویلین میں والہانہ استقبال
انہوں نے ثقافتی سفارت کاری، تعلیم اور سیاحت کے فروغ کو عوام کے قریب لانے کا مؤثر ذریعہ قرار دیا اور بتایا کہ پنجاب حکومت ڈیجیٹل نیشن کے وژن کے تحت نوجوانوں کو جدید شعبوں میں ہنرمند بنا رہی ہے۔
یاد رہے کہ یہ ملاقات پاکستان اور تھائی لینڈ کے درمیان اقتصادی تعلقات کو مضبوط کرنے اور باہمی تعاون کے فروغ کے حوالے سے ایک اہم قدم کے طور پر دیکھی جا رہی ہے۔
