وزیراعظم شہباز شریف نے بارشوں اور سیلابی صورتحال کے تناظر میں بلاول بھٹو، حافظ نعیم الرحمن اور خالد مقبول صدیقی سے رابطہ کیا، وفاقی تعاون کی پیشکش۔
اسلام آباد، وزیراعظم شہباز شریف نے ملک بھر میں جاری مون سون بارشوں اور سیلابی صورتحال کے پیش نظر مختلف سیاسی قائدین سے ٹیلی فونک رابطے کیے اور انہیں وفاقی حکومت کی جانب سے ہر ممکن تعاون کی یقین دہانی کرائی۔
ترجمان کے مطابق وزیراعظم نے چیئرمین پاکستان پیپلز پارٹی بلاول بھٹو زرداری کو فون کیا اور جنوبی سندھ بالخصوص کراچی میں موسلادھار بارشوں کے باعث شہری سیلاب اور قیمتی جانوں کے ضیاع پر افسوس کا اظہار کیا۔
اس موقع پر انہوں نے سندھ حکومت کو وفاق کی جانب سے بھرپور معاونت فراہم کرنے کی پیشکش کی اور چیئرمین این ڈی ایم اے کو ہدایت دی کہ وہ سندھ حکومت سے قریبی رابطہ رکھیں، عوام کو ممکنہ خطرات سے پیشگی آگاہ کریں اور صوبائی ڈیزاسٹر مینجمنٹ اتھارٹی کو ہر طرح کی مدد فراہم کریں۔
وزیراعظم اور آرمی چیف کا دورہ کے پی: ٹمبر مافیا اور تجاوازت کیخلاف کارروائی کا حکم
وزیراعظم نے امیر جماعت اسلامی حافظ نعیم الرحمن سے بھی گفتگو کی جس میں خیبرپختونخوا میں بارشوں سے ہونے والے نقصانات اور امدادی سرگرمیوں پر تبادلہ خیال کیا گیا۔ انہوں نے الخدمت فاؤنڈیشن کی بارشوں اور سیلاب کے دوران ریسکیو و امدادی اقدامات کو سراہا۔
اسی طرح وفاقی وزیر تعلیم و پیشہ ورانہ تربیت ڈاکٹر خالد مقبول صدیقی سے بھی وزیراعظم نے ٹیلی فونک رابطہ کیا جس میں سندھ میں حالیہ اور متوقع بارشوں کے اثرات پر گفتگو کی گئی۔ شہباز شریف نے کہا کہ وفاقی حکومت این ڈی ایم اے اور دیگر اداروں کے ذریعے صوبوں کے ساتھ ہنگامی صورتحال سے نمٹنے کے لیے مکمل تعاون جاری رکھے گی۔
یاد رہے کہ ملک بھر میں حالیہ دنوں میں ہونے والی شدید بارشوں اور سیلابی ریلوں کے باعث سندھ اور خیبرپختونخوا میں درجنوں قیمتی جانوں کا ضیاع ہو چکا ہے جبکہ کئی اضلاع میں بنیادی ڈھانچے کو بھی شدید نقصان پہنچا ہے۔
