گنیز ورلڈ ریکارڈز نے ٹیکساس کی پالتو مرغی پرل کو 14 سال اور 69 دن کی عمر میں دنیا کی معمر ترین مرغی قرار دیا، عام ایسٹر ایگر نسل کی مرغیاں اوسطاً 5 سے 8 سال تک زندہ رہتی ہیں۔
ٹیکساس، گنیز ورلڈ ریکارڈز نے ٹیکساس کے شہر لٹل ایلم کی ایک پالتو مرغی ’’پرل‘‘ کو باضابطہ طور پر دنیا کی معمر ترین زندہ مرغی قرار دے دیا، پرل کی عمر 14 سال اور 69 دن ریکارڈ کی گئی ہے۔
پرل کی مالک سونیا ہل کے مطابق، انہوں نے یہ مرغی 13 مارچ 2011ء کو اپنے ذاتی انکیوبیٹر میں انڈے سے نکالی تھی۔ گنیز ورلڈ ریکارڈز نے 22 مئی کو اس کی عمر کی تصدیق کی، جس کے بعد پرل کو یہ منفرد اعزاز حاصل ہوا۔
سونیا ہل نے بتایا کہ پرل نے تمام مشکلات کو شکست دی ہے کیونکہ اس کی نسل ایسٹر ایگر کی مرغیاں عام طور پر 5 سے 8 سال تک ہی زندہ رہتی ہیں۔ وقت گزرنے کے ساتھ پرل کی نقل و حرکت محدود ہو چکی ہے، اس لیے وہ زیادہ تر خاندان کے لانڈری روم میں وقت گزارتی ہے۔ اسے لیونگ روم میں آنے کی بھی اجازت ہے، کیونکہ ٹی وی کی آواز سن کر اسے دیکھنا پسند ہے۔
پرل نہ صرف اپنے انسانی خاندان کے ساتھ گھل مل کر رہتی ہے بلکہ گھر کی معمر بلی اور بلی کے نئے بچے کو بھی پسند کرتی ہے۔ اکثر بلی کا بچہ اس کے پاس بیٹھا نظر آتا ہے۔
سونیا ہل کے مطابق پرل کی انڈے دینے کی رفتار کم ہو گئی ہے، لیکن دلچسپ بات یہ ہے کہ اس نے ایک انڈا اسی دن دیا جب خاندان کو اطلاع ملی کہ وہ باضابطہ طور پر گنیز ورلڈ ریکارڈ ہولڈر بن گئی ہے۔
اس سے قبل سب سے معمر زندہ مرغی کا ریکارڈ امریکی ریاست ایلی نوائے کی پینٹ نامی مرغی کے پاس تھا، جو 21 سال اور 238 دن کی عمر میں 25 دسمبر 2023ء کو انتقال کر گئی تھی۔
