بنگلور ، بھارتی ریاست کرناٹک کے شہر بنگلور میں ایک حیران کن واقعہ سامنے آیا ہے جہاں چوری کے ملزم نے پولیس وردی پہن کر اپنی بیوی کو ویڈیو کال کی، جس پر اصل پولیس اہلکار کو معطل کر دیا گیا ہے۔
واقعہ 2024 میں گونڈاپور تھانے کی حدود میں پیش آیا تھا تاہم اس کا انکشاف 2025 میں ہونے والی تفتیش کے دوران ہوا۔
بھارتی میڈیا کے مطابق تھانے کے کانسٹیبل ایچ آر سونار نے ایک خطرناک چور، جو 50 مقدمات میں مطلوب تھا، کو قیمتی سامان کی برآمدگی کے لیے شہر سے باہر ایک ہوٹل میں رکھا۔ کانسٹیبل اور ان کا ساتھی اہلکار اسے کمرے میں بند کرکے خود خریداری کے لیے چلے گئے۔ اس دوران چور نے کانسٹیبل کی وردی پہن کر بیوی کو ویڈیو کال کی تاکہ خود کو پولیس افسر ظاہر کر کے متاثر کر سکے۔
معاملہ اس وقت بے نقاب ہوا جب مئی 2025 میں اندرا نگر میں ایک چوری کی تفتیش کے دوران پولیس نے چور کے موبائل فون سے وردی میں تصاویر اور ویڈیو کال کے اسکرین شاٹس برآمد کیے۔ ان تصاویر میں کانسٹیبل سونار کا نام بیج واضح طور پر نظر آ رہا تھا۔
حکام کا کہنا ہے کہ پولیس اہلکار کی سنگین غفلت اور ممکنہ ملی بھگت پر اسے معطل کر دیا گیا ہے۔ ساتھ ہی یہ تفتیش بھی جاری ہے کہ آیا چور کے پولیس اہلکاروں سے قریبی تعلقات نے اسے گرفتاری سے بچنے یا مزید جرائم کرنے میں مدد دی
