امریکی صدر ڈونلڈ ٹرمپ نے ایران کے ساتھ جاری کشیدگی کے تناظر میں واضح کیا ہے کہ واشنگٹن تہران کی اس پیشکش کو قبول کرنے کے لیے تیار نہیں جس میں آبنائے ہرمز کھولنے اور امریکی ناکہ بندی ختم کرنے کی بات کی گئی تھی۔ ان کے مطابق امریکا کا مؤقف یہ ہے کہ کسی بھی نرمی سے پہلے ایران کو جوہری معاہدے پر آمادہ ہونا ہوگا۔
ایک انٹرویو میں صدر ٹرمپ نے دعویٰ کیا کہ ایران کے خلاف امریکی اقدامات اپنے اہداف کے قریب پہنچ چکے ہیں اور ایران کی میزائل بنانے کی صلاحیت کافی حد تک متاثر ہو چکی ہے۔ انہوں نے کہا کہ ایران کے بڑی تعداد میں میزائل تباہ کیے جا چکے ہیں اور اسے کسی صورت جوہری ہتھیار حاصل نہیں کرنے دیے جائیں گے۔
رپورٹس کے مطابق امریکی سینٹرل کمانڈ نے ایران کے خلاف محدود لیکن مؤثر فضائی حملوں کا ایک منصوبہ تیار کیا ہے، جس کا مقصد مذاکرات میں تعطل ختم کرنا بتایا جا رہا ہے۔ اگرچہ ابھی تک کسی کارروائی کی باضابطہ منظوری نہیں دی گئی، تاہم امکان ظاہر کیا جا رہا ہے کہ ان حملوں میں اہم تنصیبات کو نشانہ بنایا جا سکتا ہے۔
صدر ٹرمپ کا کہنا تھا کہ بحری ناکہ بندی ایران پر دباؤ ڈالنے کا زیادہ مؤثر ذریعہ ثابت ہو رہی ہے اور اس کے نتیجے میں ایران کو شدید معاشی مشکلات کا سامنا ہے۔ انہوں نے مزید دعویٰ کیا کہ تیل کی برآمدات متاثر ہونے سے ایران کے ذخائر اور پائپ لائنز پر بھی دباؤ بڑھ گیا ہے، اگرچہ بعض ماہرین اس مؤقف سے اتفاق نہیں کرتے۔
امریکا کا مؤقف: ایران کے خلاف جنگ قومی سلامتی کے تحفظ کے لیے لڑی گئی
ادھر ایرانی ذرائع نے خبردار کیا ہے کہ اگر ناکہ بندی جاری رہی تو اس کا غیر معمولی اور عملی ردعمل سامنے آ سکتا ہے۔ ایرانی حکام کا کہنا ہے کہ اب تک صبر کا مظاہرہ سفارتی حل کے لیے کیا گیا، لیکن مسلسل دباؤ کی صورت میں سخت اقدامات کیے جا سکتے ہیں۔
دوسری جانب صدر ٹرمپ نے ایک اور موقع پر گفتگو کرتے ہوئے کہا کہ ایران کی عسکری صلاحیتیں بری طرح متاثر ہو چکی ہیں، جبکہ اس کی معیشت بھی کمزور ہو رہی ہے اور کرنسی کی قدر گر چکی ہے۔ انہوں نے ایک بار پھر اس عزم کا اظہار کیا کہ ایران کو جوہری طاقت بننے کی اجازت نہیں دی جائے گی اور کسی بھی معاہدے سے پہلے اس مسئلے کا حل ضروری ہے۔
