سیالکوٹ میں پولیس نے ٹک ٹاکر انصر جٹ المعروف مسٹر پتلو کو گرفتار کرلیا ہے۔ ان کی مہندی کی تقریب میں بدانتظامی اور بھگدڑ کے باعث 2 افراد جاں بحق اور درجنوں زخمی ہوگئے تھے، جس کے بعد واقعے کا مقدمہ درج کیا گیا تھا۔
میڈیا رپورٹس کے مطابق مسٹر پتلو کی گرفتاری اسی مقدمے کے تناظر میں عمل میں آئی ہے، جو جاں بحق ہونے والے نوجوان ریحان کے بہنوئی کی مدعیت میں درج کیا گیا تھا۔
مہندی کی تقریب میں بھگدڑ سے 2 افراد جاں بحق
رپورٹ کے مطابق مسٹر پتلو کی مہندی کی تقریب کے دوران بدانتظامی کے باعث بھگدڑ مچ گئی تھی، جس کے نتیجے میں 2 افراد جان کی بازی ہار گئے جبکہ درجنوں افراد زخمی ہوئے تھے۔
واقعے کے بعد جاں بحق نوجوان ریحان کے بہنوئی نے مقدمہ درج کرایا تھا۔ اس مقدمے میں انصر جٹ المعروف مسٹر پتلو اور ان کے بھائی کاشف بشیر کو نامزد کیا گیا ہے۔
مدعی اور اہلخانہ کو دھمکیاں دینے کا الزام
مقدمے کے مدعی کی جانب سے الزام عائد کیا گیا ہے کہ قتل کے مقدمے میں نامزد ملزمان انہیں اور ان کے اہلخانہ کو سنگین نتائج کی دھمکیاں دے رہے ہیں۔
مدعی نے اس حوالے سے پولیس کو درخواست دی تھی، جس میں مسٹر پتلو اور ان کے بھائی کاشف بشیر کو نامزد کیا گیا۔
مہندی کی تقریب میں بھگدڑ کا کیس، ٹک ٹاکر مسٹر پتلو کی حفاظتی ضمانت منظور
مسٹر پتلو پہلے بھی عبوری ضمانت پر تھے
رپورٹ کے مطابق ٹک ٹاکر مسٹر پتلو اس سے قبل بھی مقدمے میں نامزد تھے اور انہوں نے مختلف قانونی دفعات کے تحت درج مقدمے میں عبوری ضمانت حاصل کر رکھی تھی۔
ان کے خلاف درج مقدمے میں دفعات 149، 148، 109، 188، 440، 431 اور 322 سمیت دیگر دفعات شامل ہیں۔
واقعے میں 2 افراد کی ہلاکت اور درجنوں کے زخمی ہونے کے بعد مقدمہ قانونی کارروائی کا حصہ بنا، جبکہ اب پولیس نے مسٹر پتلو کو گرفتار کرلیا ہے۔ مقدمے میں نامزد دیگر افراد کے حوالے سے مزید کارروائی کی تفصیلات سامنے آنا باقی ہیں۔
