وزیراعلیٰ پنجاب Maryam Nawaz نے کہا ہے کہ صوبائی حکومت خشک سالی اور صحرائی پھیلاؤ کے چیلنج سے نمٹنے کے لیے مؤثر اقدامات کر رہی ہے، جن میں چھوٹے ڈیمز اور تالابوں کی تعمیر بھی شامل ہے۔
صحرائی اور خشک سالی سے نمٹنے کے عالمی دن کے موقع پر اپنے پیغام میں وزیراعلیٰ نے کہا کہ اس دن کا مقصد زمین کے بنجر ہونے، زرخیزی میں کمی اور خشک سالی کے اثرات سے متعلق عوامی آگاہی پیدا کرنا ہے۔ انہوں نے کہا کہ پنجاب حکومت زراعت، پانی کے بہتر انتظام اور موسمیاتی تبدیلیوں کے اثرات کم کرنے کے لیے عملی اقدامات پر عمل پیرا ہے۔
مریم نواز نے بتایا کہ چولستان اور تھل سمیت صحرائی علاقوں میں بنجر زمینوں کو دوبارہ قابلِ کاشت بنانے کے لیے خصوصی فنڈز مختص کیے گئے ہیں، جبکہ شجرکاری مہم کے ساتھ زیتون جیسی کم پانی استعمال کرنے والی فصلوں کی کاشت کو بھی فروغ دیا جا رہا ہے۔
انہوں نے کہا کہ خشک سالی زرعی پیداوار اور غذائی تحفظ کے لیے ایک بڑا خطرہ بن چکی ہے، اس لیے ماحول دوست پالیسیوں اور درختوں کی شجرکاری کو فروغ دینا وقت کی اہم ضرورت ہے۔
وزیراعلیٰ پنجاب مریم نواز کی شریف میڈیکل سٹی اسپتال میں میجر سرجری
وزیراعلیٰ کے مطابق جنگلات کے تحفظ اور جنگلی حیات کی نگرانی کے لیے جدید ٹیکنالوجی، بشمول تھرمل سینسرز، استعمال کیے جا رہے ہیں۔ انہوں نے اس بات پر بھی زور دیا کہ بنجر زمینوں کی بحالی اور پانی کی قلت کے مسائل سے نمٹنے کے لیے عالمی سطح پر تعاون ناگزیر ہے۔
انہوں نے مزید کہا کہ حکومت "ریزیلینٹ اینڈ انکلوسیو ایگریکلچر ٹرانسفارمیشن” پروگرام کے تحت آبپاشی کے نظام کو بہتر بنا رہی ہے، جبکہ زرعی شعبے میں پانی کے مؤثر استعمال کے لیے سولر توانائی سے چلنے والے جدید ہائی ایفیشینسی اریگیشن سسٹمز بھی نصب کیے جا رہے ہیں۔
