لاہور: وزیراعلیٰ پنجاب مریم نواز نے لاہور کے علاقے کاہنہ میں ٹیوشن سینٹر کی چھت گرنے کے المناک واقعے کا فوری نوٹس لیتے ہوئے متعلقہ حکام سے تفصیلی رپورٹ طلب کر لی ہے۔
وزیراعلیٰ نے حادثے میں 14 بچوں کے جاں بحق ہونے پر گہرے دکھ اور افسوس کا اظہار کیا اور سوگوار خاندانوں سے تعزیت کرتے ہوئے زخمی بچوں کو فوری اور بہترین طبی سہولیات فراہم کرنے کی ہدایت جاری کی۔
واضح رہے کہ کاہنہ میں قائم ایک ٹیوشن سینٹر کی چھت اچانک گرنے سے متعدد بچے ملبے تلے دب گئے تھے۔ ریسکیو ٹیموں نے امدادی کارروائی کرتے ہوئے متاثرین کو نکالا اور قریبی اسپتالوں میں منتقل کیا۔
کاہنہ ٹیوشن سینٹر سانحہ: چھت گرنے کے واقعے کا مقدمہ درج، 5 افراد حراست میں
وزیر صحت پنجاب خواجہ عمران نذیر کے مطابق حادثے میں 14 بچوں کی جان چلی گئی، جبکہ 19 بچوں کو کاہنہ اسپتال منتقل کیا گیا۔ ان میں سے 5 زخمی بچے تاحال زیر علاج ہیں۔
علاقہ مکینوں کے مطابق حادثے کے وقت بچے معمول کے مطابق ٹیوشن کلاس میں موجود تھے۔ حکام نے واقعے کی وجوہات جاننے کے لیے تحقیقات کا آغاز کر دیا ہے۔
