کوئٹہ: بلوچستان کے مختلف اضلاع میں پیٹرولیم مصنوعات کی شدید قلت کے باعث ایندھن کی قیمتوں میں غیر معمولی اضافہ دیکھنے میں آ رہا ہے، جہاں بعض علاقوں میں پیٹرول اور ڈیزل 500 روپے فی لیٹر تک فروخت ہونے کی اطلاعات ہیں۔
ذرائع کے مطابق متعدد شہروں میں پیٹرول پمپس پر سپلائی متاثر ہونے کے باعث شہریوں کو ایندھن کے حصول میں شدید مشکلات کا سامنا ہے۔ قلت کے نتیجے میں لمبی قطاریں لگ رہی ہیں جبکہ کئی مقامات پر مکمل طور پر ایندھن کی فراہمی بند ہونے کی شکایات بھی سامنے آئی ہیں۔
علاقہ مکینوں کا کہنا ہے کہ پیٹرولیم مصنوعات کی عدم دستیابی کے باعث نہ صرف روزمرہ آمد و رفت متاثر ہو رہی ہے بلکہ ٹرانسپورٹ نظام بھی شدید دباؤ کا شکار ہے۔ اس صورتحال کے باعث اشیائے ضروریہ کی ترسیل میں بھی رکاوٹیں پیدا ہونے کا خدشہ ظاہر کیا جا رہا ہے۔
قیمتوں میں کمی کے باوجود پیٹرول اور ڈیزل اب بھی مہنگے، عوامی ریلیف محدود
شہریوں نے حکومت اور متعلقہ اداروں سے مطالبہ کیا ہے کہ پیٹرول کی فوری اور مؤثر فراہمی یقینی بنائی جائے اور ناجائز منافع خوری میں ملوث عناصر کے خلاف سخت کارروائی کی جائے تاکہ بحران پر قابو پایا جا سکے۔
دوسری جانب حکام کا کہنا ہے کہ صورتحال پر مسلسل نظر رکھی جا رہی ہے اور پیٹرولیم مصنوعات کی سپلائی لائن کو بحال کرنے کے لیے اقدامات جاری ہیں تاکہ جلد از جلد معمولات زندگی بحال ہو سکیں۔
