اسلام آباد: وفاقی وزیر پٹرولیم علی پرویز ملک نے کہا ہے کہ باب المندب میں رکے ہوئے تیل بردار جہاز اپنی منزل کی جانب روانہ ہو چکے ہیں، جس کے باعث عالمی سپلائی میں بہتری آ رہی ہے اور آئندہ چند روز میں پیٹرولیم مصنوعات کی قیمتوں پر بھی مثبت اثرات متوقع ہیں۔
میڈیا سے گفتگو کرتے ہوئے علی پرویز ملک کا کہنا تھا کہ گزشتہ چند روز کے دوران قیمتوں میں اضافے کا رجحان اب کم ہونا شروع ہو گیا ہے۔ ان کے مطابق اگر عالمی منڈی میں موجودہ صورتحال برقرار رہی تو پیٹرولیم مصنوعات کی قیمتوں میں استحکام اور ممکنہ کمی دیکھنے کو مل سکتی ہے۔
وفاقی وزیر نے واضح کیا کہ ملک میں پیٹرولیم مصنوعات کی قیمتوں کا تعین آئل اینڈ گیس ریگولیٹری اتھارٹی (اوگرا) مقررہ طریقہ کار اور فارمولے کے مطابق کرتی ہے، جبکہ حکومت اسی نظام کے تحت فیصلے کرتی ہے۔
انہوں نے مزید بتایا کہ آئل ٹینکرز مالکان کو درپیش مسائل کے حل کے لیے ایک خصوصی کمیٹی قائم کر دی گئی ہے، جو کرایوں، کوٹہ سسٹم اور دیگر متعلقہ معاملات کا جائزہ لے کر قابلِ عمل سفارشات پیش کرے گی تاکہ تیل کی ترسیل کا نظام مزید مؤثر بنایا جا سکے۔
