کراچی کی سڑکوں پر محنت مزدوری کرتے ہوئے منظرِ عام پر آنے والے اظہر میمن کی زندگی میں بڑا مثبت موڑ آ گیا۔ سوشل میڈیا پر وائرل ہونے والی ویڈیوز کے بعد انہیں پاکستان ٹیلی ویژن کارپوریشن (پی ٹی وی) میں بی ایس 16 کی ملازمت کی پیشکش کر دی گئی ہے۔
اظہر میمن نے انسٹیٹیوٹ آف بزنس ایڈمنسٹریشن کراچی (آئی بی اے کراچی) سے ایم بی اے کی ڈگری حاصل کی تھی، تاہم زندگی کے مشکل حالات کے باعث وہ کراچی کی سڑکوں پر محنت مزدوری کرتے نظر آئے۔ ان کی ویڈیوز اور انٹرویوز سوشل میڈیا پر تیزی سے وائرل ہوئے، جس کے بعد صارفین کی بڑی تعداد نے ان کے حالات پر افسوس اور ہمدردی کا اظہار کیا۔
سوشل میڈیا پر یہ سوال بھی اٹھایا گیا کہ ملک کے ممتاز تعلیمی ادارے سے تعلیم حاصل کرنے والا نوجوان کس طرح ایسے حالات تک پہنچ گیا۔ کئی صارفین نے اس صورتحال کو معاشی مشکلات اور روزگار کے محدود مواقع سے جوڑ کر دیکھا۔
وائرل ویڈیو سامنے آنے کے بعد وفاقی وزیر عطا تارڑ نے اظہر میمن سے ملاقات کی اور ان کی پیشہ ورانہ معاونت کے لیے اقدامات کیے۔ بعد ازاں انہیں پی ٹی وی نیٹ ورک میں گریڈ 16 کی ملازمت کی پیشکش کی گئی۔
بھارتی بیانیہ بے نقاب ہو چکا، پاکستان ہر چیلنج کا جواب دینے کیلئے تیار ہے: ڈی جی آئی ایس پی آر
اظہر میمن کی آفر لیٹر کے ساتھ تصاویر بھی سوشل میڈیا پر گردش کر رہی ہیں، جہاں صارفین اس پیش رفت کو امید، حوصلے اور سوشل میڈیا کی مثبت طاقت کی مثال قرار دے رہے ہیں۔
بہت سے افراد نے خوشی کا اظہار کرتے ہوئے لکھا کہ حالات کسی بھی وقت بدل سکتے ہیں، جبکہ بعض صارفین نے اس امر کی جانب توجہ دلائی کہ معاشرے میں اب بھی بے شمار باصلاحیت افراد مواقع اور مدد کے منتظر ہیں۔
اظہر میمن کی کہانی کو اب ایک ایسی مثال کے طور پر دیکھا جا رہا ہے جہاں سوشل میڈیا پر سامنے آنے والی ایک ویڈیو نے ایک نوجوان کی زندگی کا رخ بدل دیا۔
