صدر مملکت آصف زرداری کا مادر جمہوریت بیگم نصرت بھٹو کی 13 ویں برسی کے موقع پر اپنے پیغام میں کہنا ہے کہ پاکستان میں جمہوریت کی بحالی میں بیگم نصرت بھٹو کی خدمات ناقابل فراموش ہیں۔
اسلام آباد: صدر مملکت آصف علی زرداری نے مادر جمہوریت بیگم نصرت بھٹو کی 13ویں برسی کے موقع پر ان کی سیاسی خدمات کو خراج عقیدت پیش کیا ہے۔ انہوں نے اپنے پیغام میں کہا کہ بیگم نصرت بھٹو نے پاکستان میں جمہوریت کی بحالی کے لئے جو قربانیاں دیں وہ ناقابل فراموش ہیں۔ صدر زرداری کا کہنا تھا کہ بیگم نصرت بھٹو نے آمریت کے خلاف عوام کے حقوق کی جدوجہد میں ثابت قدمی اور بہادری سے قیادت فراہم کی۔
آصف زرداری نے کہا کہ بیگم نصرت بھٹو نے آمریت کے ظلم و ستم کے سامنے جرات اور دلیری کا مظاہرہ کیا، اور وہ نہ صرف مادر جمہوریت بلکہ عزم اور حوصلے کی علامت بھی ہیں۔ ان کا مزید کہنا تھا کہ بیگم نصرت بھٹو ایک مدبر رہنما تھیں، جنہوں نے خواتین کی خودمختاری اور سیاست میں ان کی شمولیت کو فروغ دینے میں اہم کردار ادا کیا۔
صدر مملکت نے کہا کہ پاکستان میں جمہوریت کی مضبوطی کے لئے ہمیں بیگم نصرت بھٹو کے نظریے کو مشعل راہ بنانے کی ضرورت ہے۔ انہوں نے اس موقع پر ان کے مشن کو جاری رکھنے کے عزم کا اعادہ کیا اور کہا کہ بیگم نصرت بھٹو کے مشن پر کاربند رہتے ہوئے ملک میں جمہوریت کی مضبوطی اور عوامی فلاح و بہبود کے لئے کام جاری رکھیں گے۔
