ڈپٹی کمشنر گجرات صفدر حسین ورک نے نواز شریف پارک کا دورہ کیا اور پارک میں صفائی، نکاسی آب اور دیگر تفریحی سہولیات کا جائزہ لیا۔
گجرات میں ڈپٹی کمشنر صفدر حسین ورک نے لیڈیز اینڈ چلڈرن پارک اور نواز شریف پارک کا دورہ کرتے ہوئے صفائی، نکاسی آب، اور دیگر تفریحی سہولیات کا جائزہ لیا۔ ان کے ساتھ سی او میونسپل کارپوریشن خالق داد گاڑا اور چیف سینٹری انسپکٹر نصر اللہ بھی موجود تھے۔ دورے کے دوران ڈپٹی کمشنر نے فوری طور پر پارکس میں موجود پانی کی نکاسی کا حکم دیا اور بہترین صفائی، جھولے، واش رومز، اور پینے کے پانی کی فراہمی کے انتظامات پر زور دیا۔
انہوں نے پارکس میں گھاس کی تراش خراش اور غیر ضروری جھاڑیوں کی کانٹ چھانٹ پر بھی زور دیا، تاکہ پارکس کو مزید خوبصورت اور محفوظ بنایا جا سکے۔ ڈپٹی کمشنر صفدر حسین ورک نے شہریوں کو بہترین تفریحی سہولیات فراہم کرنے کے لیے دستیاب وسائل کے بھرپور استعمال کا عندیہ دیا۔ انہوں نے پارکس کی صفائی کے لیے خصوصی سینٹری اسکواڈ تشکیل دینے کی ہدایت بھی دی، تاکہ روزانہ کی بنیاد پر صفائی یقینی بنائی جا سکے۔
ڈپٹی کمشنر نے مزید ہدایت دی کہ تمام میونسپل کمیٹیز کے چیف افسران اپنے علاقوں میں موجود پارکس کی تزئین و آرائش اور ضروری مرمت کا کام جلد مکمل کریں اور پارکس میں روشنی کا مناسب انتظام یقینی بنائیں، تاکہ شہریوں کو معیاری تفریحی ماحول فراہم کیا جا سکے۔
