تہران، ممکنہ اسرائیلی حملے پر ایران کی جانب سے سخت وارننگ جاری کردی گئی۔
ایرانی وزیر خارجہ کے مطابق دفاع کے لیے اب ہماری کوئی سرخ لکیریں نہیں ہیں، ہم جنگ نہیں امن چاہتے ہیں لیکن جنگ کے لیے بھی پوری طرح تیار ہیں۔
ایرانی فوج کے کمانڈر کا کہنا ہے کہ تیاری پوری ہے، اسرائیل ایران پر حملے کی غلطی کا خمیازہ بُھگتے گا۔
دوسری جانب اسرائیل اور امریکہ کی ایران پر حملہ کرنے کی صورت میں ممکنہ جوابی کارروائی روکنے کی مشترکہ تیاریاں بھی جاری ہیں۔
پینٹاگون نے کہا کہ صدر بائیڈن کی ہدایت پر اسرائیلی دفاع کو مضبوط کرنے کیلئے جدید اینٹی میزائل سسٹم تھاڈ اور امریکی فوجی اسرائیل میں تعینات کیے جا رہے ہیں۔
دوسری جانب نیویارک، مشرق وسطیٰ میں بڑھتی کشیدگی کو مدنظر رکھتے ہوئے ایران اور اسرائیل کے درمیان جنگ کا خطرہ موجود ہے اور امریکہ اسرائیل کی حفاظت کیلئے میدان میں آگیا ہے۔
غیر ملکی میڈیا کے مطابق 2 ہفتے پہلے ہونیوالے ایرانی میزائل حملوں کے جواب میں اسرائیل حملے کی تیاری کر رہا ہے اور اس کے جواب میں مزید ایرانی حملوں کے دفاع کی بھی تیاری کا جائزہ لے رہا ہے۔
غیر ملکی رپورٹ کے مطابق ایران نے بھی کسی ممکنہ حملے کی صورت میں جوابی حملے کا منصوبہ تیار کررکھا ہے۔
