ڈپٹی کمشنر گجرات صفدر حسین ورک کی ہدایات پر اپنی چھت اپنا گھرپروگرام، رمضان سہولت، مریم کی دستک، آسان کاروبار،کسان کارڈ، مینارٹی کارڈ، لائیوسٹاک کارڈ، اور دیگر انفارمیشن کاؤنٹرز شہریوں کو سہولیات فراہم کر رہے ہیں
گجرات: ڈپٹی کمشنر گجرات صفدر حسین ورک کی ہدایات پر وزیر اعلیٰ پنجاب مریم نواز شریف کے خصوصی احکامات کے تحت متعدد عوامی بہبود کے منصوبے جاری ہیں۔ ڈپٹی کمشنر کمپلیکس میں اپنی چھت اپنا گھر، کسان کارڈ، مریم کی دستک، آسان کاروبار، مینارٹی کارڈ، لائیوسٹاک کارڈ اور دیگر فلاحی منصوبوں کے انفارمیشن کاؤنٹرز قائم کیے گئے ہیں، جہاں شہریوں کو مختلف سہولیات فراہم کی جا رہی ہیں۔
ڈپٹی کمشنر نے کہا کہ اپنی چھت اپنا گھر اسکیم کے تحت شہریوں کو گھروں کی تعمیر کے لیے 15 لاکھ روپے تک کے بلاسود قرضے فراہم کیے جا رہے ہیں، جن کے تمام سروس چارجز حکومت پنجاب خود ادا کرے گی۔ اسی طرح کسان کارڈ کے ذریعے کسانوں کو سبسڈی، مالی معاونت اور زرعی پیداوار بڑھانے کے مواقع دیے جا رہے ہیں، جبکہ ہمت کارڈ کم آمدنی والے افراد کی فلاح و بہبود کے لیے اہم اقدام ہے۔
ڈپٹی کمشنر نے مزید کہا کہ تمام تحصیل دفاتر میں ہیلپ ڈیسک بھی قائم کیے گئے ہیں، جہاں شہری اپنے مسائل کے حل اور معلومات کے لیے رجوع کر سکتے ہیں۔ انہوں نے عملے کو ہدایت دی کہ شہریوں کی مکمل رہنمائی کی جائے اور ان کے مسائل کا فوری حل یقینی بنایا جائے، تاکہ عوامی فلاح کے ان منصوبوں سے زیادہ سے زیادہ لوگ مستفید ہو سکیں۔
