لاہور، صوبائی وزیر اطلاعات عظمیٰ بخاری کا کہنا ہے کہ پنجاب حکومت کی کارکردگی کچھ لوگوں کو ہضم نہیں ہو رہی۔
لاہور میں پریس کانفرنس کے دوران وزیراطلاعات پنجاب عظمیٰ بخاری نے کہا کہ پنجاب حکومت کو1 سال مکمل ہوا، وزیراعلیٰ مریم نواز کی حکومت کا ایک بھی منصوبہ ادھورا نہیں ہے، کوئی بھی منصوبہ ایسا نہیں کہ کہا جارہا ہو شرو ع کریں گے، ہر منصوبے کا بتانے کیلئے دروازے پر دستک نہیں دی جاتی۔
عظمیٰ بخاری کا کہنا ہے کہ ایک پارٹی کو پنجاب حکومت کی کارکردگی سے بہت مسئلہ ہورہا ہے، عثمان بزدار کو اپنا تعارف کرانے کیلئے شہبازشریف کے نام کی ضرورت پڑتی تھی، پی ٹی آئی والے اپنے دور حکومت میں مریم نواز کو والد کے سامنے گرفتار کرنے میں مصروف تھے، پنکی اور گوگی کا رشوت کا بازار گرم تھا، ان کے دور میں ہرعہدے کا ایک ریٹ مقرر تھا۔
صوبائی وزیر کا کہنا ہے کہ پی ٹی آئی کا دور حکومت سکینڈلز سے بھرا رہا، پی ٹی آئی کے دور میں پیسے لیکر تقررو تبادلے کیے جاتے تھے، پی ٹی آئی کے منصوبوں کا کوئی ریکارڈ نہیں، یہ منصوبے صرف سوشل میڈیا پر تھے،بانی پی ٹی آئی ان کیلئے مہاتما تھے، مہاتما نے خود کہا عثمان بزدار اپنی کارکردگی اشتہارات کے ذریعے بتائیں۔
عظمیٰ بخاری کا کہنا ہے کہ پی ٹی آئی کے کسی اشتہار پر کوئی بڑا منصوبہ نظر نہیں آئے گا، انہوں نے اپنے دور میں تبدیلی کا پروگرام، 50 ہزار گھر،لاکھوں نوکریوں والا اشتہار چھاپا تھا، عثمان بزدار نے اپنے دور میں کچھ کرکے نہیں دکھایا، ان نالائقوں کے پاس فرصت نہیں تھی یہ مصروف تھے۔
وزیراعلیٰ مریم نواز نے 5 سالہ ٹرانسپورٹ پروگرام کی منظوری دیدی
لیگی رہنما نے کہا کہ تحریک انصاف کیطرف سے پنجاب حکومت کیخلاف پراپیگنڈا کیا جارہا ہے، انہوں نے 2 دن سے ایک مہم شروع کی ہوئی ہے، یہ کہہ رہے ہیں منصوبے تحریک انصاف کے اورتختی مریم نواز کی، ڈائیلسز کا پروگرام بزدار کا نہیں شہبازشریف نے شروع کیا تھا، وزیراعلیٰ مریم نواز نے ڈائیلسز کارڈ کیلئے 10 لاکھ روپے مختص کردیئے ہیں۔
عظمیٰ بخاری کا کہنا ہے کہ ایئرایمبولینس کے نعرے بھی بہت بار لگے، ایئرایمبولینس کے نعرے پرویزالٰہی اورعثمان بزدار نے بھی لگائے، ایئرایمبولینس وزیراعلیٰ مریم نواز حکومت کے پہلے 6ماہ میں لائیں۔
صوبائی وزیر کا کہنا ہے کہ یہ کسان کارڈ پر بھی بات کرتے ہیں، تحقیقات کے بعد پتہ چلا ان کے کسی منصوبے کی کوئی ڈیٹیل موجود نہیں، آج کسان کارڈ پر ساڑھے 7لاکھ سے زیادہ لوگ اربوں روپے کی خریداری کرچکے ہیں۔
