اسلام آباد، وفاقی وزیر اطلاعات عطا تارڑ نے کہا کہ کبھی وکیل تبدیل کرتے تھے اور کبھی وکالت نامہ، بانی پی ٹی آئی عمران خان نے تاخیری حربوں میں پی ایچ ڈی کی ہوئی ہے۔
سینیٹر طلال چودھری کے ساتھ میڈیا سے گفتگو کے دوران وفاقی وزیر اطلاعات عطا تارڑ کا کہنا ہے کہ عمران خان کا ہر کیس تاخیر کا شکار ہوا، فارن فنڈنگ کیس میں غیر حاضری اور تاخیر 6 سال پر محیط تھی، توشہ خانہ مقدمے میں 2 دو ماہ کی تاریخیں لیتے تھے۔
عطا تارڑ نے کہا کہ تاریخ لینا ان کا ہمیشہ وتیرہ رہا ہے، جو بندا سچا ہوتا ہے وہ کبھی تاخیر نہیں کرتا، تاریخ نہیں لیتا، توشہ خانہ کیس میں انہوں نے اسلام آباد ہائی کورٹ سے سٹے آرڈر لیا، 190 ملین پاؤنڈ پر کہا جاتا ہے ہم نے تو ٹرسٹ بنایا۔
وفاقی وزیر اطلاعات کا کہنا ہے کہ کابینہ میں بند لفالفہ کون لیکر جاتا ہے؟ کابینہ کے چند اراکین نے کہا لفافہ کھول کر دکھایا جائے، آپ نے اربوں روپے اٹھایا اور جرمانہ معاف کرانے کیلئے سپریم کورٹ میں جمع کرا دیا، اس رقم کیساتھ اتنا بڑا جرمانہ معاف کیا گیا۔
عطاتارڑ نے کہا کہ سابق وزیراعظم عمران خان، اہلیہ اور دیگر نے زمینیں اور 5 کیرٹ کی انگوٹھی لی، 190 ملین پاؤنڈ پاکستان کی تاریخ کا میگا کرپشن کیس ہے، یہ اتنی بڑی کرپشن ہے کہ تاریخ میں مثال کم ملے گی۔
وفاقی وزیر اطلاعات کا کہنا ہے کہ کیا کبھی ایسا ہوتا ہے کہ میاں بیوی مل کر زمین بنالیں، یہ اتفاق نہیں سوچا سمجھا منصوبہ تھا، سوہاوا میں زمین کیوں لی گئی؟ پراپرٹی ڈویلپمنٹ کیلئے ان کے پورے پلان تھے۔