وزیراعظم پاکستان شہباز شریف کی جانب سے آئی سی سی چیمپئنز ٹرافی کے حوالے سے چیئرمین پی سی بی محسن نقوی پر مکمل اعتماد کا اظہار کر دیا گیا۔
وزیر اعظم سے وزیر داخلہ و چیئرمین پاکستان کرکٹ بورڈ محسن نقوی نے ملاقات کی، چیئرمین پی سی بی نے شہباز شریف کو آئی سی سی چیمپئنز ٹرافی ٹورنامنٹ کی پیشرفت سے متعلق آگاہ کیا۔
وزیراعظم پاکستان نے کہا کہ چیمپئنز ٹرافی ٹورنامنٹ کے حوالے سے آپ کا موقف ہر پاکستانی کے دل کی آواز ہے، آئی سی سی میں آپ نے پاکستان کے 24 کروڑ عوام کی ترجمانی کی۔
شہباز شریف کا کہنا تھا کہ پاکستان کی عزت سب سے پہلے ہے اور اس کے بعد کچھ اور ہے، اس موقع پر چیئرمین پی سی بی محسن نقوی کا کہنا ہے کہ ہم پاکستان اور کرکٹ کی جیت چاہتے ہیں، انشاءاللہ چیمپئنز ٹرافی کے حوالے سے اچھی خبر سامنے آئے گی۔
دوسری جانب آزاد کشمیر حکومت کی جانب سے جلسے جلوس اور ریلیوں پر پابندی سے متعلق متنازع صدارتی آرڈیننس واپس لے لیا گیا۔
حکومت کی جانب سے جاری کردہ نوٹیفکیشن کے مطابق صدارتی آرڈیننس کے تحت بغیر اجازت جلسے جلوسوں پر پابندی عائد کی گئی تھی تاہم اب صدارتی آرڈیننس واپس لے لیا گیا ہے۔
