گورنر خیبر پختونخوا فیصل کریم کنڈی کا کہنا ہے کہ عمران خان کی اہلیہ بشری بی بی کا دکھڑا سن کر افسوس ہوا کہ انہیں تنہا چھوڑ دیا گیا تھا۔
فیصل کریم کنڈی کا کہنا تھا کہ خیبرپختونخوا کی صوبائی حکومت اسلام آباد میں آگ لگانے کی بجائے صوبے میں لگی آگ کو بجھائے۔
گورنر کے پی، نے سوال کیا کہ کیا عوام کے ٹیکس کے پیسے صرف تحریک انصاف کے کارکنان کیلئے ہیں؟ کیا صوبے میں شہید ہونے والے دیگر لوگوں کے ورثا کو بھی 1،1 کروڑ روپے ملیں گے؟
واضح رہے کہ گزشتہ روز بشریٰ بی بی اسلام آباد دھرنے میں جاں بحق ہونے والے تاج الدین کے گھر گئیں جہاں انہوں نے ورثا سے تعزیت کی اور انہیں 1 کروڑ کا چیک دیا۔
اس موقع پر بات چیت کرتے ہوئے عمران خان کی اہلیہ بشریٰ بی بی کا کہنا تھا کہ شہادتوں کی وجہ سے تکلیف میں تھی، میں بھاگنے والی عورت نہیں ہوں، مجھے ڈی چوک پر اکیلا چھوڑ دیا گیا تھا، سمجھ نہیں آرہا تھا لوگ جھوٹ کیوں بول رہے تھے۔
بشریٰ بی بی نے کہا کہ خان کیلئے نکلنے والوں کو کبھی اکیلا نہیں چھوڑ سکتی تھی، کسی کو نہیں پتا تھا کہ میری گاڑی کون سی ہے، ڈی چوک پر رات ساڑھے 12 بجے میں اپنی گاڑی میں اکیلی تھی، وہ ڈی چوک زبردستی خالی کرارہے تھے۔
