گجرات پولیس نے چوری کی ایک اہم واردات کا سراغ لگاتے ہوئے ملزم کو گرفتار کر لیا اور اس کے قبضے سے مسروقہ طلائی زیورات سمیت واردات میں استعمال ہونے والا اسلحہ بھی برآمد کر لیا۔
پولیس ترجمان کے مطابق تھانہ صدر سرائے عالمگیر کی ٹیم نے جرائم پیشہ عناصر کے خلاف جاری کارروائیوں کے دوران ایک ایسے ملزم کو گرفتار کیا جو چند روز قبل ایک رہائشی گھر میں چوری کی واردات میں ملوث تھا۔
واقعہ موضع قصبہ کریالی، تھانہ صدر سرائے عالمگیر کی حدود میں پیش آیا تھا، جہاں شہری کے گھر سے قیمتی سامان اور طلائی زیورات چوری کر لیے گئے تھے۔ اطلاع ملنے پر پولیس نے فوری مقدمہ درج کر کے تفتیش کا آغاز کیا۔
ایس ایچ او تھانہ صدر سرائے عالمگیر اور ان کی ٹیم نے جدید ٹیکنالوجی اور پیشہ ورانہ تفتیشی مہارتوں کو بروئے کار لاتے ہوئے مختصر وقت میں ملزم شمروز آصف کو گرفتار کر لیا۔
سرائے عالمگیر میں افسوسناک حادثہ، نوجوان بس کی زد میں آ کر جاں بحق
پولیس کے مطابق گرفتار ملزم کے قبضے سے تقریباً چار تولہ طلائی زیورات برآمد کیے گئے ہیں، جبکہ واردات کے دوران استعمال ہونے والا 30 بور پستول بھی تحویل میں لے لیا گیا ہے۔
پولیس حکام کا کہنا ہے کہ ملزم سے مزید تفتیش جاری ہے اور اس بات کا جائزہ لیا جا رہا ہے کہ آیا وہ دیگر وارداتوں میں بھی ملوث رہا ہے یا نہیں۔ شہریوں کے جان و مال کے تحفظ کے لیے جرائم پیشہ عناصر کے خلاف کارروائیاں بلا تعطل جاری رکھی جائیں گی۔
