دنیا کے معمر ترین اور دوسرے معمر ترین مرد کی تاریخ پیدائش ایک ہی ہے، دونوں میں صرف ایک سال کا فرق ہے اور دلچسپ اتفاق یہ ہے کہ دونوں نے اپنی سالگرہ پر ایک دوسرے کو مبارکباد بھی دی۔
دنیا میں طویل عمر پانے والے افراد کی زندگی ہمیشہ لوگوں کی توجہ کا مرکز رہتی ہے، تاہم آسٹریلیا کے کین ویکس اور برازیل کے جوآؤ مارینو نیٹو کی کہانی اس حوالے سے خاصی دلچسپ ہے۔
دونوں افراد کی پیدائش 5 اکتوبر کو ہوئی اور ان کی عمروں میں صرف ایک سال کا فرق ہے۔ برازیل سے تعلق رکھنے والے جوآؤ مارینو نیٹو 114 سال کی عمر کے ساتھ دنیا کے معمر ترین مرد ہیں، جبکہ آسٹریلیا کے کین ویکس 113 سال کی عمر میں دنیا کے دوسرے معمر ترین مرد قرار دیے جاتے ہیں۔
ایک ہی تاریخ کو پیدائش، ایک دوسرے کو سالگرہ کی مبارکباد
جوآؤ مارینو نیٹو کی پیدائش 5 اکتوبر 1912 کو برازیل کے علاقے Maranguape میں ہوئی، جبکہ کین ویکس 5 اکتوبر 1913 کو آسٹریلیا کے نیو ساؤتھ ویلز کے علاقے Grafton میں پیدا ہوئے۔
دونوں کی سالگرہ ایک ہی دن ہونے کی وجہ سے اس بار ایک منفرد موقع سامنے آیا۔ 114 سالہ جوآؤ مارینو نے 113 سالہ کین ویکس کو سالگرہ کی مبارکباد دی، جس پر آسٹریلوی معمر شخص نے خوشی کا اظہار کیا۔
کین ویکس نے بھی ایک ویڈیو پیغام ریکارڈ کرا کے جوآؤ مارینو کو ان کی سالگرہ پر مبارکباد دی۔ دلچسپ بات یہ ہے کہ دونوں کے درمیان تقریباً 14 ہزار کلومیٹر کا فاصلہ ہے اور یہ پیغامات کسی پیشگی منصوبہ بندی کے بغیر ایک دوسرے تک پہنچے۔
78 سالہ اسکاٹش خاتون نے فورٹ نائٹ میں معمر ترین اسٹریمر کا عالمی ریکارڈ بنا لیا
کین ویکس کی زندگی اور خاندان
کین ویکس اس وقت آسٹریلیا کے ایک اولڈ ایج ہوم میں مقیم ہیں، جہاں وہ 2018 سے رہ رہے ہیں۔ اس سے قبل انہوں نے اپنی زندگی کے 105 سال اپنے آبائی قصبے میں گزارے۔
ان کے 2 بیٹے اور 3 پوتے پوتیاں ہیں۔ کین ویکس نے دوسری جنگ عظیم کے دوران آسٹریلیا کی فضائی فوج کا حصہ بننے کی کوشش بھی کی تھی، تاہم وہ اس میں کامیاب نہیں ہوسکے۔
انہوں نے 1941 میں جین میکافی سے شادی کی، جن سے ان کے 2 بیٹے ہوئے۔ ان کی اہلیہ کا انتقال 1986 میں ہوگیا، جس کے بعد کین ویکس کئی برس تک خودمختار زندگی گزارتے رہے۔
100 سال کی عمر میں بھی متحرک رہے
کین ویکس کی طویل زندگی کا ایک نمایاں پہلو ان کا فعال رہنا بھی ہے۔ ان کے مطابق وہ جسمانی طور پر متحرک رہنا پسند کرتے تھے اور 100 سال کی عمر میں بھی اپنی خریداری خود کیا کرتے تھے۔
ان کی پوتی کا کہنا ہے کہ ان کے دادا ایک پرعزم شخصیت ہیں اور ہمیشہ اپنے اردگرد موجود لوگوں کی زندگی بہتر بنانے کی خواہش رکھتے ہیں۔
عمر کا منفرد عالمی ریکارڈ
کین ویکس اور جوآؤ مارینو نیٹو کی سالگرہ کا یہ اتفاق اس لیے بھی غیر معمولی ہے کہ دونوں دنیا کے سب سے زیادہ عمر رسیدہ مردوں میں شامل ہیں۔
ایک ہی تاریخ کو پیدا ہونے والے ان دونوں افراد نے اپنی طویل زندگی کے دوران ایک صدی سے زیادہ کا سفر طے کیا اور اب ایک دوسرے کو سالگرہ کی مبارکباد دینا ان کی زندگی کی ایک منفرد یاد بن گیا ہے۔ دونوں کے درمیان عمر کا صرف ایک سال کا فرق ہے، لیکن پیدائش کی تاریخ ایک ہونے کی وجہ سے ان کی سالگرہ کا یہ اتفاق خاص اہمیت اختیار کرگیا ہے۔
