وزیر اعلیٰ پنجاب مریم نواز نے چینی وزیراعظم لی چیانگ کی پاکستان آمد پر پرجوش خیر مقدم کیا۔
لاہور میں وزیراعلیٰ مریم نواز شریف نے شنگھائی تعاون تنظیم (ایس سی او) کانفرنس کے شرکاء کو خوش آمدید کہتے ہوئے رکن ممالک کے سربراہان کی 23 ویں اجلاس میں شرکت کو پاکستان کے لیے خوش آئند قرار دیا ہے۔ انہوں نے کہا کہ پاکستان میں سربراہان مملکت کی آمد باعث فخر ہے، اور اس اجلاس سے باہمی تعاون کے نئے مواقع پیدا ہوں گے۔ مریم نواز نے کہا کہ ایس سی او سمٹ کانفرنس کا انعقاد پوری قوم کے لیے ایک اعزاز کی بات ہے، جس سے غربت کے خاتمے اور معاشی ترقی کے اہداف حاصل کیے جا سکیں گے۔ انہوں نے کانفرنس کو پاکستان کے لیے گیم چینجر قرار دیا۔
مزید برآں، وزیراعلیٰ نے چین کے وزیراعظم لی چیانگ کے استقبال کے موقع پر انہیں حکومت پنجاب اور عوام کی طرف سے خوش آمدید کہا۔ انہوں نے چینی وزیراعظم کے دورہ پاکستان کو پاک چین دوستی کے نئے باب کی شروعات قرار دیتے ہوئے کہا کہ چین اور پاکستان کے درمیان تعلقات عالمی امن، خطے کی خوشحالی اور ترقی کے ضامن ہیں۔ مریم نواز نے یہ بھی کہا کہ پاک چین تعلقات میں مضبوطی کا سہرا محمد نواز شریف کو جاتا ہے، جبکہ محمد شہباز شریف نے بھی ان تعلقات کو مزید مستحکم کرنے میں اہم کردار ادا کیا ہے۔
انہوں نے یہ بھی کہا کہ پاکستان مسلم لیگ (ن) کے دور حکومت میں شروع ہونے والا سی پیک پاک چین دوستی کا زندہ ثبوت ہے، اور چینی وزیراعظم کی آمد سے سی پیک پراجیکٹس میں مزید تیزی آئے گی جس سے لاکھوں روزگار کے مواقع پیدا ہوں گے۔ انہوں نے مزید کہا کہ پاکستان اور چین کی دوستی، اعتماد اور احترام پر مبنی ہے، اور دونوں ممالک مل کر خوشحال اور پرامن مستقبل کی جانب گامزن ہیں۔ بیلٹ اینڈ روڈ انیشیٹو کو عالمی خوشحالی کے لیے چین کے عزم کا اظہار قرار دیتے ہوئے، مریم نواز نے کہا کہ چین کی اقتصادی ترقی کے فوائد سے دنیا بھر کے لوگ مستفید ہو رہے ہیں۔
