سابق امریکی صدر اور صدارتی امیدوار ری پبلکن ڈونلڈ ٹرمپ کی ریلی سے اسلحہ بردار شخص کو حراست میں لے لیا گیا۔
غیر ملکی میڈیا کے مطابق ریاست کیلیفورنیا کے علاقے کوچیلا میں ڈونلڈ ٹرمپ کی ریلی کے دوران ایک مشتبہ شخص کو حراست میں لیا گیا جس کے قبضے سے لوڈڈ گن اور جعلی پاسپورٹ برآمد ہوا ہے۔
پولیس کے مطابق 49 سالہ مشتبہ شخص کی شناخت ویم ملر کے نام سے ہوئی ہے، جو کالے رنگ کی گاڑی میں آیا اور اسے چیک پوائنٹ پر ہی پکڑا گیا جہاں اس سے 2 قسم کا اسلحہ اور بھرے ہوئے میگزین برآمد ہوئے ہیں۔
پولیس کا کہنا ہے کہ مشتبہ شخص کو کسی بھی تخریبی کارروائی سے پہلے ہی حراست میں لے لیا گیا اور اس کا اسلحہ بھی قبضے میں لے لیا گیا ہے۔
امریکی سیکریٹ سروس کے مطابق افسوناک واقعے کے بعد سابق صدر کو کوئی خطرہ نہیں اور اس واقعے نے حفاظتی آپریشنز کو متاثر نہیں کیا ہے۔
مقامی سکیورٹی حکام کی جانب سے مشتبہ شخص کو ذہنی مریض قرار دیتے ہوئے یہ کہا گیا کہ اس کارروائی میں ٹرمپ کی سکیورٹی اور ان کی ریلی کے شرکا پر کوئی فرق نہیں پڑا۔
یاد رہے کہ امریکا میں 5 نومبر کو صدارتی الیکشنز ہونا ہیں اور اس سلسلے میں مہم کے دوران ٹرمپ پر قاتلانہ حملہ ہوا جس میں وہ شدیدزخمی ہوئے تھے۔
