شاعر مشرق اور حکیم الامت علامہ محمد اقبال کا 149 واں یوم پیدائش آج ملک بھر میں عقیدت و احترام سے منایا جا رہا ہے۔ اس موقع پر مزار اقبال پر گارڈز کی تبدیلی کی پروقار تقریب منعقد ہوئی، جس میں پاک بحریہ کے دستے نے اعزازی گارڈز کے فرائض سنبھال لیے۔
پاکستان کا خواب دیکھنے اور اپنی شاعری کے ذریعے برصغیر کے مسلمانوں میں بیداری کا جذبہ پیدا کرنے والے علامہ محمد اقبال 9 نومبر 1877 کو سیالکوٹ میں پیدا ہوئے۔ انہوں نے گورنمنٹ کالج لاہور کے علاوہ برطانیہ اور جرمنی میں بھی اعلیٰ تعلیم حاصل کی۔ ان کی شاعری میں مسلمانوں کی فکری رہنمائی، خودی، آزادی اور ایک باوقار زندگی کے حصول کا پیغام نمایاں ہے۔
علامہ اقبال کے افکار اور شاعری کا اثر نہ صرف پاکستان بلکہ دنیا بھر میں محسوس کیا جاتا ہے۔ ان کے شعری مجموعے بانگ درا، بال جبریل اور ضرب کلیم آج بھی بالخصوص نوجوانوں میں امید، خود اعتمادی اور عمل کا جذبہ پیدا کرتے ہیں۔ قوم اپنے اس عظیم مفکر اور شاعر کو آج بھی عقیدت سے یاد کرتی ہے۔
صدر مملکت کا علامہ اقبال کو خراج عقیدت
صدر مملکت آصف علی زرداری نے یوم اقبال کے موقع پر اپنے پیغام میں علامہ محمد اقبال کو خراج عقیدت پیش کیا۔ انہوں نے کہا کہ اقبال کے کلام نے برصغیر کے مسلمانوں کو یہ احساس دلایا کہ وہ اپنے مستقبل کا فیصلہ خود کرنے کی صلاحیت رکھتے ہیں۔
صدر مملکت کے مطابق علامہ اقبال نے مسلمانوں کی امنگوں کو فکری رہنمائی فراہم کی۔ ان کی شاعری میں آزادی اور باعزت زندگی کے حصول کے لیے جدوجہد کا پیغام ملتا ہے۔
شاعرِ مشرق علامہ اقبال کا 148 واں یومِ پیدائش آج عقیدت و احترام کے ساتھ منایا جا رہا ہے
آصف علی زرداری نے کہا کہ اقبال نے اپنی شاعری کے ذریعے استحصال کے خلاف آواز بلند کی اور غریب و محنت کش طبقے کو ان کے حقوق اور معاشرے میں مقام کا احساس دلایا۔ ان کے کلام میں محنت کرنے والوں کی عزت اور وقار کو خصوصی اہمیت حاصل ہے۔
مزار اقبال پر گارڈز کی تبدیلی کی تقریب
یوم پیدائش کے موقع پر لاہور میں مزار اقبال پر گارڈز کی تبدیلی کی پروقار تقریب منعقد ہوئی۔ پاکستان نیوی کے اسٹیشن کمانڈر لاہور کموڈور مصباح الامین تقریب کے مہمان خصوصی تھے۔
کموڈور مصباح الامین نے مزار اقبال پر پھول چڑھائے اور فاتحہ خوانی کی۔ اس موقع پر انہوں نے گارڈز میں شامل پاکستان رینجرز اور پاک بحریہ کے دستوں کا معائنہ بھی کیا۔
تقریب کے دوران پاک بحریہ کے چاق و چوبند دستے نے مزار اقبال پر اعزازی گارڈز کے فرائض سنبھال لیے۔ یہ تقریب شاعر مشرق کی قومی اور فکری خدمات کو خراج عقیدت پیش کرنے کی ایک اہم روایت کا حصہ ہے۔
